कुवेतमा विषाक्त मदिरा काण्ड : १२ नेपालीसहित २३ आप्रवासीको मृत्यु

कुवेतमा अवैध रूपमा उत्पादन गरिएको विषाक्त मदिरा सेवनका कारण मृत्यु हुने नेपालीको संख्या बढेर १२ पुगेको छ । नेपाली दूतावासका अनुसार, आइतबारसम्म करिब ३० जना नेपाली विभिन्न अस्पतालमा उपचाररत रहेका छन् ।

गत सातादेखि ‘मेथानोल’ नामक खतरनाक रसायन मिसाइएको अवैध मदिरा सेवनका कारण कुवेतभर १६० जनाभन्दा बढी बिरामी परेका थिए । स्वास्थ्य मन्त्रालयका विवरणअनुसार, हालसम्म विभिन्न देशका २३ जना आप्रवासी कामदारले ज्यान गुमाइसकेका छन् ।

प्रहरी कारबाही : ६७ जना पक्राउ

घटनापछि कुवेतको आन्तरिक मन्त्रालयले व्यापक छापा मार्दै अवैध मदिरा उत्पादन तथा बिक्रीमा संलग्न ६७ जनालाई पक्राउ गरेको छ । पक्राउ पर्नेहरूमध्ये नेपाली, भारतीय र बंगलादेशी नागरिक रहेका छन् ।

सुरक्षा निकायले साल्मिया क्षेत्रमा एक नेपालीलाई मेथानोलसहित नियन्त्रणमा लिएपछि अन्य व्यक्तिहरूको संलग्नता फेला परेको जनाएको छ । पक्राउ परेकामध्ये केहीमाथि हत्यासम्बन्धी अभियोग समेत लगाइने बताइएको छ ।

त्यसैगरी, छापा मार्दा ६ वटा अवैध मदिरा कारखाना नियन्त्रणमा लिइएका छन् । साथै श्रम कानुन उल्लङ्घन, अवैध बसोबास र भिसा ओभरस्टेमा संलग्न २५८ जना आप्रवासीलाई पनि पक्राउ गरिएको छ ।

उपचारपछि देश निकाला

कुवेती अधिकारीहरूले विषाक्त मदिरा सेवनपछि अस्पतालमा भर्ना भएका सबै आप्रवासीलाई उपचारपछि देश निकाला गर्ने निर्णय लिएका छन् । उनीहरूलाई डिस्चार्ज भएपछि पक्राउ गरी अनुसन्धान गर्ने र पुनः कुवेत प्रवेशमा प्रतिबन्ध लगाइने जनाइएको छ ।

कुवेतमा मदिरा उत्पादन, बिक्री र सेवन कानूनी रूपमा पूर्ण प्रतिबन्धित छ । यस्तो गतिविधिमा संलग्नलाई कडा सजायसहित देश निकाला गर्ने व्यवस्था छ ।

नेपाली समुदायमा नकारात्मक असर

कुवेतमा करिब १ लाख ६० हजार नेपाली कार्यरत छन् । पछिल्ला वर्षहरूमा नेपाली कामदारहरू लागूऔषध ओसारपसार तथा अवैध मदिरा प्रकरणमा मुछिँदै आएको भन्दै समुदायमा नकारात्मक छवि बनेको दूतावासले जनाएको छ ।

नेपाली दूतावास र गैरआवासीय नेपाली संघ (एनआरएन) कुवेतले आप्रवासीलाई कानुन विपरीतका गतिविधिबाट टाढा रहन आग्रह गरेका छन् । दूतावासका अनुसार, हाल कुवेतका जेलमा रहेका नेपालीमध्ये ५० प्रतिशतभन्दा बढी रक्सी वा लागूऔषधसम्बन्धी मुद्दामा परेका छन् ।