दीपमालाको शिरमा मिस नेपालको ताज : एनआरएनको पहिचानमा नयाँ उचाइ

काठमाडौं । मिस नेपाल वल्र्ड–२०२६ को उपाधि दोस्रो पुस्ताकी गैरआवासीय नेपाली (एनआरएन) दीपमाला ढकालले जितेपछि विश्वभरका नेपालीहरुले बधाई दिइरहेका छन् ।

विशेगरी ९० देशमा फैलिएको गैरआवासीय नेपाली संघमा आवद्ध नेपालीहरुले ढकालको उपाधिलाई गर्वको विषय मानिएको छ ।

उपाधि केवल एउटा सौन्दर्य प्रतियोगिताको परिणाम मात्र होइन, विदेशमा जन्मिएर वा हुर्किएर पनि आफ्नो नेपाली पहिचानलाई गर्वका साथ स्थापित गर्न सकिने सन्देश बोकेको उपलब्धिका रुपमा लिइएको छ ।

यस सफलताले दोस्रो पुस्ताका एनआरएनलाई नेपालसँग भावनात्मक, सांस्कृतिक र सामाजिक रूपमा जोड्ने अभियानलाई बल पुगेको देखिन्छ ।

गत चैतमा सम्पन्न गैरआवासीय नेपाली संघ (एनआरएनए) को एकता महाधिवेशनबाट पहिलोपटक विधानमै व्यवस्था गरिएको ‘सेकेन्ड जेनेरेसन कोअर्डिनेटर’ पदमा निर्वाचित भएकी दीपमाला अहिले मिस नेपालको ताज जित्न सफल भएकी हुन् ।

विदेशमा जन्मे तथा हुर्किएका नेपाली मूलका युवालाई नेपालसँग जोड्ने उद्देश्यले सिर्जना गरिएको यो भूमिकाले उनको जितलाई अझ अर्थपूर्ण बनाएको छ । एनआरएनएकी उपाध्यक्ष रोजिना प्रधान राईले ढकालको ताजलाई ऐतिहासिक उपलब्धि ठानेको बताएकी छिन् ।

हङकङमा जन्मिएर हुर्किएकी दीपमालाले नेपाली भाषा, संस्कृति र पहिचानप्रतिको आफ्नो प्रतिबद्धतालाई केवल शब्दमा होइन, व्यवहारमै प्रमाणित गरेकी हुन् ।

एनआरएनएका प्रवक्ता सोमनाथ सापकोटाले ढकालको उपलब्धिलाई विज्ञप्तिमार्फत तारिफ गरेका छन् । ‘यो उपलब्धि केवल व्यक्तिगत सफलतामा सीमित नभई विश्वभर रहेका गैरआवासीय नेपाली समुदाय, विशेषतः दोस्रो पुस्ताका नेपाली युवापुस्ताका लागि प्रेरणा, आत्मविश्वास र नेपाली पहिचानप्रतिको गौरवको प्रतीक बनेको छ । यस सफलताले विश्वभरिका दोस्रो पुस्ताका नेपालीलाई आफ्नो भाषा, संस्कृति, मूल्य–मान्यता र मातृभूमिसँग अझ सशक्त रूपमा जोडिन प्रेरित गर्ने विश्वास लिएका छौँ,’ विज्ञप्तिमा भनिएको छ ।

मिस नेपाल हङकङको उपाधि जितिसकेकी उनी तेक्वान्दोकी ब्ल्याक बेल्ट खेलाडी, म्याराथन धावक तथा अर्थशास्त्रमा स्नातक हुन् ।

उनले विश्वकै अग्रणी लगानी व्यवस्थापन कम्पनी ‘ब्ल्याकरक’मा इन्भेस्टमेन्ट एनालिस्टका रूपमा सुरक्षित र आकर्षक करिअर हुँदाहुँदै नयाँ चुनौती स्वीकार्दै नेपाललाई रोजेकी हुन् ।

ढकालले आगामी दिनमा प्रतिष्ठित मिस वल्र्डमा सहभागि हुन पाउने विषयलाई एनआरएनएले शुभकामना पनि दिएको छ । ‘विश्वसामु नेपालको समृद्ध कला, संस्कृति, पर्यटन, विविधता र राष्ट्रिय पहिचानलाई प्रभावकारी रूपमा प्रवद्र्धन गर्दै नेपालको सकारात्मक छवि उजागर गर्न सफल हुनुहुनेछ भन्ने विश्वास छ । यहाँको सहभागिताले नेपाल र विश्वभर रहेका गैरआवासीय नेपाली समुदायबीचको सम्बन्धलाई अझ सुदृढ बनाउँदै दोस्रो पुस्तामा नेपालीपनप्रतिको अपनत्व र गर्वलाई थप उचाइमा पुरÞ्याओस् भन्ने हार्दिक शुभेच्छा व्यक्त गर्दछौं,’ विज्ञप्तिमा भनिएको छ ।

सन् १९९४ मा आयोजित पहिलो मिस नेपाल प्रतियोगितामा उनकी आमा रोशनी खरेल प्रतिस्पर्धी बनेकी थिइन् । मिस नेपालको फाइनलमा २४ प्रतिस्पर्धीबाट अन्तिम ६ मा स्थान बनाउँदै विजेता बनेकी दीपमालाले आफ्नो क्षमता, आत्मविश्वास र स्पष्ट प्रस्तुतिमार्फत निर्णायकहरूको मन जितेकी हुन् ।