‘आबाट आमा’ को बक्सअफिसमा धमाका, १० दिनमै ५ करोड २० लाख कमाइ

काठमाडौं । पल शाह अभिनित फिल्म ‘आबाट आमा’ ले घरेलु बक्सअफिसमा उत्साहजनक व्यापार गर्दै सफलता उन्मुख यात्रा तय गरेको छ। प्रदर्शनको पहिलो १० दिनमै फिल्मले देशभरबाट ५ करोड २० लाख रुपैयाँ ग्रस कमाइ गर्न सफल भएको हो।

चन्द्र पन्तको निर्देशनमा तयार भएको यो फिल्म १६ माघ शुक्रबार देखि देशव्यापी प्रदर्शनमा आएको थियो। प्रदर्शन सुरु भएको छोटो समयमै दर्शकको राम्रो साथ पाउँदै हलहरूमा उल्लेख्य भीड देखिएको छ।

उक्त अवधिसम्म फिल्मका १ लाख ७६ हजारभन्दा बढी टिकट बिक्री भइसकेका छन्। यसअघि २४ माघ अर्थात् पछिल्लो शनिबारसम्म फिल्मले ४ करोड ८० लाख ९० हजार ४ सय ८७ रुपैयाँ ग्रस संकलन गरेको तथ्यांक सार्वजनिक गरिएको थियो। त्यसपछि आइतबारको कमाइ जोडिँदा फिल्म ५ करोड नाघ्न सफल भएको हो।

फिल्ममा शीर्ष पात्र कृष्ण को भूमिकामा पल शाह देखिएका छन्। उनका आमाबुबाको भूमिकामा प्रदीप रावत र विपना थापा छन्। त्यसैगरी उषा उप्रेती प्रेम सम्बन्धको पात्रका रूपमा छिन् भने सिम्रन पन्त कृष्णलाई मन पराउने तर नपाएपछि बदलाको बाटो रोज्ने चरित्रमा देखिएकी छन्।

फिल्ममा प्रकाश कुवँर, ध्रुव न्यौपाने र क्षितिज ढुंगाना को लगानी रहेको छ। दर्शकको साथ कायम रहेमा आगामी दिनमा कमाइ अझै उकालो लाग्ने अपेक्षा गरिएको छ।