मोटरसाइकल दुर्घटना बढ्दै: सुदूरपश्चिममा चार महिनामै ६२ जनाको ज्यान

२७ कात्तिक, धनगढी।
सुदूरपश्चिम प्रदेशमा चार महिनाको अवधिमा भएका विभिन्न सवारी दुर्घटनाले ६२ जनाको ज्यान लिएको तथ्यांक सार्वजनिक भएको छ। चालू आर्थिक वर्ष २०८२/८३ को साउनदेखि कात्तिकसम्म संकलन गरिएको डेटा अनुसार दुर्घटनामा परेर ७९५ जनाले चोटपटक पाएका छन्, जसमा ४३० जनाको अवस्था गम्भीर रहेको छ।

प्रदेश ट्राफिक प्रहरी कार्यालय, अत्तरियाले दिएको विवरणअनुसार दुर्घटनामा सर्वाधिक पुरूषको मृत्यु भएको छ।
ज्यान गुमाउनेमध्ये ४३ जना पुरूष, १६ जना महिला, र ३ जना बालबालिका रहेका छन्।
त्यस्तै गम्भीर घाइतेमध्ये २७७ पुरूष, ९६ महिला, ३३ बालक र २४ बालिका रहेको प्रहरीले जनाएको छ।

सामान्य घाइतेतर्फ पनि पुरुषको संख्या नै धेरै छ—२५० पुरुष, ७१ महिला, २७ बालक र १७ बालिका।

मोटरसाइकल दुर्घटना सबैभन्दा बढी

साउन, भदौ, असोज र कात्तिक महिनामा भएको कुल ५७९ सवारी दुर्घटनामध्ये ३३७ वटा मोटरसाइकल मात्रै दुर्घटना भएका छन्।
अन्यमा—६६ जीप/कार, ४७ अटो–टेम्पो, २१ बस, १९ ट्र्याक्टर, १३ माइक्रो र ९९ अन्य सवारीसाधन रहेका छन्।

महिना अनुसार दुर्घटनाको संख्या:

• साउन: १७५

• असोज: १५४

• भदौ: १३८

• कात्तिक: ११२

ट्राफिक प्रहरीका प्रवक्ता डिएसपी टेकबहादुर जोराका अनुसार ९० प्रतिशत दुर्घटना चालकको लापरवाहीका कारण हुने गरेको छ।
उनका अनुसार पहाडी क्षेत्रमा कच्ची सडक, र तराई क्षेत्रमा छाडा चौपायाले बाटो अवरुद्ध गर्ने समस्या पनि प्रमुख कारण बनेका छन्। यान्त्रिक गडबडीका कारण हुने दुर्घटना भने विगतका वर्षको तुलनामा घटेको प्रहरीको भनाइ छ।