दाउन्ने सडकखण्ड वर्षभरि ६३ पटक अवरुद्ध, निर्माण कार्यले थपिएको समस्या

नवलपरासी (बर्दघाट सुस्तापूर्व) अन्तर्गत बुटवल–नारायणगढ सडकखण्डको दाउन्ने क्षेत्र पछिल्लो एक वर्षमा ६३ पटक अवरुद्ध भएको छ । साउन १ गते २०८१ देखि असार ३२ गते २०८२ सम्मको अवधिमा यो सडक पूर्ण वा आंशिक रूपमा पटक–पटक अवरुद्ध हुँदै आएको जिल्ला ट्राफिक प्रहरी कार्यालय नवलपरासीका प्रमुख जनक बन्जाराले जानकारी दिए ।

सडक अबरुद्ध हुनुमा मुख्यतः वर्षाका कारण आएको पहिरो र माटोका साथै, मर्मतका क्रममा प्रयोग भएका ठूला उपकरणका कारण जाम हुनु तथा सवारी बिग्रेर बाटो थुनिनु प्रमुख कारण रहेको बताइएको छ ।
विशेष गरी विश्वकर्मा मन्दिर, घ्युखोला र त्रियासी मोड आसपासका क्षेत्रलाई बढी संवेदनशील मानिन्छ ।

दाउन्ने पहाडमा सडक विस्तारका लागि भित्तो कटान थालिएपछि अबरुद्ध हुने क्रम झनै बढेको छ । १४ किलोमिटर दूरी रहेको यो क्षेत्रमा गत आर्थिक वर्ष अघिल्ला वर्षभन्दा धेरै पटक सडक अवरुद्ध भएको छ ।

“वर्षामा पहिरो, हिलो र सडक कटान, घाम लाग्दा धुलो र खाल्डाखुल्डी — यी सबैले दाउन्ने क्षेत्र सधैं समस्याग्रस्त बनाइरहेको छ,” प्रमुख बन्जाराले भने ।

गत पुस २६ गते विनयी खोला पुल भाँचिएपछि यातायात झनै अस्तव्यस्त बनेको थियो । अस्थायी डाइभर्सन निर्माण गरिएको भए पनि खोलाले पटक–पटक बगाउँदा सडक आवागमन बारम्बार अवरुद्ध हुन पुगेको थियो ।

तर, गत असार १९ गतेदेखि विनयी खोलामा नयाँ पुल सञ्चालनमा आएपछि भने त्यो समस्या केही हदसम्म समाधान भएको छ ।

सडक विस्तारका क्रममा गत चैत २७ देखि ३१ गतेसम्म दिनको ११ देखि ३ बजेसम्म र वैशाख १ देखि ३१ गतेसम्म रातिको ११ देखि बिहान ५ बजेसम्म अत्यावश्यकबाहेकका सवारी आवागमनमा रोक लगाइएको थियो ।

हाल दाउन्ने क्षेत्रमा पर्खाल निर्माण, कल्भर्ट र सडक ढलानको काम भइरहेका छन् । पूर्वी खण्डका सूचना अधिकारी इञ्जिनियर शिव खनालका अनुसार तीन लेनको सडक विस्तार अन्तर्गत बजार क्षेत्रमा सर्भिस लेनसहित ६ लेन र जोखिमयुक्त दाउन्ने क्षेत्रमा तीन लेनको काम भइरहेको छ ।

यो आयोजनाको जिम्मा लिएको चाइना स्टेट इञ्जिनियरिङ कर्पोरेसनले तीनपटक म्याद थप गरिसकेको छ भने साउन मसान्तभित्र काम सक्नुपर्ने लक्ष्य राखिएको छ ।