विश्वकप फाइनलअघि भावुक बने मेस्सी : ‘हाम्रो सबैभन्दा ठूलो उपलब्धि उपाधि होइन, यो यात्रा हो’

काठमाडौं । अर्जेन्टिनाका कप्तान लियोनेल मेस्सीले फिफा विश्वकप २०२६ को फाइनलअघि आफ्ना टोलीका खेलाडी, प्रशिक्षक तथा समर्थकप्रति भावुक सन्देश व्यक्त गर्दै टोलीको सबैभन्दा ठूलो उपलब्धि उपाधिभन्दा पनि सँगै बिताएको यात्रा भएको बताएका छन् ।

स्पेनविरुद्ध हुने विश्वकप फाइनलअघि इन्स्टाग्राममार्फत सन्देश साझा गर्दै मेस्सीले अर्जेन्टिनाको राष्ट्रिय टोलीलाई एउटा परिवारका रूपमा स्थापित गर्न सबैले खेलेको भूमिकाप्रति आभार व्यक्त गरे ।

‘यी सबै वर्षहरूको सबैभन्दा सुन्दर पक्ष केवल उपाधि थिएन, सँगै तय गरेको सम्पूर्ण यात्रा थियो । कठिन समयमा एकअर्कालाई साथ दिँदै, हरेक क्षणलाई रमाइलो बनाउँदै अघि बढ्नु नै हाम्रो सबैभन्दा ठूलो उपलब्धि हो,’ मेस्सीले लेखेका छन् ।

आठ पटकका बालोन डीओर विजेता मेस्सीले आफ्ना सबै सहकर्मी, प्रशिक्षक र टोलीसँग जोडिएका सम्पूर्ण सदस्यलाई धन्यवाद दिँदै जे भए पनि यो अर्जेन्टिनी टोलीले इतिहासमा अमिट छाप छोडिसकेको बताए ।

‘भोलि जे भए पनि यो टोलीले यस्तो इतिहास लेखिसकेको छ, जसलाई कसैले मेटाउन सक्दैन । अर्जेन्टिना, अघि बढछ,’ उनले भने । न्युयोर्कको न्युजर्सी स्टेडियममा आइतबार हुने फाइनलमा साविक विजेता अर्जेन्टिनाले युरोपियन च्याम्पियन स्पेनसँग उपाधिका लागि प्रतिस्पर्धा गर्नेछ । अर्जेन्टिना लगातार दोस्रो विश्वकप जित्ने लक्ष्यमा छ भने स्पेन सन् २०१० पछि पहिलो पटक विश्वकपको उपाधि जित्ने प्रयासमा छ ।

सेमिफाइनलमा अर्जेन्टिनाले इंग्ल्यान्डलाई २–१ ले पराजित गर्दै फाइनल यात्रा तय गरेको थियो । खेलमा एन्जो फर्नान्डेजले बराबरी गोल गरेपछि लाउटारो मार्टिनेजले इन्जुरी समयमा विजयी गोल गरेका थिए ।

यता स्पेनले फ्रान्सलाई २–० ले हराउँदै दोस्रो पटक विश्वकप फाइनलमा स्थान बनाएको हो। लामिन यामालले उत्कृष्ट प्रदर्शन गर्दै पेनाल्टी जिताएका थिए, जसलाई मिकेल ओयार्जाबालले गोलमा परिणत गरेका थिए । दोस्रो हाफमा पेड्रो पोरोले अर्को गोल थप्दै स्पेनलाई सहज जित दिलाए ।

फाइनलअघि स्पेनका मुख्य प्रशिक्षक लुइस डे ला फुएन्टेले अर्जेन्टिनाविरुद्धको खेल उच्चस्तरीय र रोमाञ्चक हुने विश्वास व्यक्त गरेका छन् । दुवै टोलीको खेल शैली, प्रतिभा र आक्रामक फुटबलप्रतिको प्रतिबद्धता समान भएकाले समर्थकले उत्कृष्ट प्रतिस्पर्धा हेर्न पाउने उनले बताए ।

अर्जेन्टिनाका प्रशिक्षक लियोनेल स्कालोनीले भने उपाधि जित्न टोलीले आफ्नो उत्कृष्ट प्रदर्शन गर्नुपर्ने बताएका छन् । उनले स्पेनको खेल शैलीको विस्तृत अध्ययन गरिएको उल्लेख गर्दै अर्जेन्टिना आफ्नो उत्कृष्ट संस्करण प्रस्तुत गर्न तयार रहेको बताए ।

स्कालोनीले ३९ वर्षको उमेरमा पनि अर्को विश्वकप फाइनलमा पुगेका मेस्सीको विशेष प्रशंसा गर्दै उनलाई फुटबल इतिहासकै महान् खेलाडीमध्ये एक भएको उल्लेख गरे । उनले मेस्सी र वर्तमान अर्जेन्टिनी टोलीले पछिल्ला वर्षहरूमा देशलाई अविस्मरणीय सफलता दिलाएको बताए । एएनआई