एसइई नतिजा : बाजुरामा ६१.९ प्रतिशत विद्यार्थी उत्तीर्ण

बाजुरा । बाजुराबाट माध्यामिक शिक्षा परीक्षा एसइईमा ६१ दशमलव ९ प्रतिशत विद्यार्थीहरु उत्तीर्ण भएका छन् । (एसइई) २०८२ मा बाजुराको समग्र ग्रेडेड प्रतिशत ६१.९ पुगेको हो ।
शिक्षा विकास तथा समन्वय इकाई बाजुराले सार्वजनिक गरेको विवरण अनुसार,जिल्लाभरबाट परीक्षामा सहभागी २ हजार १ सय २६ विद्यार्थीमध्ये १ हजार ३ सय १६ जना ग्रेडेड भएका छन् । भने ८ सय १० विद्यार्थी नन–ग्रेडमा परेका हुन् ।
परीक्षामा साधारण धारतर्फ एक हजार २५१ र प्राविधिक धारतर्फबाट ६५ जना विद्यार्थी उत्तीर्ण भएका छन्, भने साधारणबाट ७६९ र प्राविधिकबाट ४१ गरी ८१० जना नन ग्रेडमा परेको शिक्षा विकास तथा समन्वय इकाई बाजुराले जनाएको छ ।
यस वर्ष जिल्लाका ६८ विद्यालयका विद्यार्थीहरुको परीक्षामा सहभागीता रहेको थियो।सामुदायिक विद्यालय तर्फ २ हजार २० विद्यार्थी सहभागी भएकोमा १ हजार २ सय ५१ जना ग्रेडेड भएका हुन् । संस्थागततर्फ १ सय ६ विद्यार्थीमध्ये ६५ जना ग्रेडेड भएका हुन् ।
४ जीपीए ल्याउने शून्य ः
जिल्लामा यस बर्ष ४ जीपीए ल्याउने विद्यार्थी शून्य छन् । सार्वजनिक नतिजा अनुसार बाजुराबाट ४ जीपीए ल्याउने विद्यार्थी एक जना पनि छैनन् । सबैभन्दा बढी विद्यार्थी २.८ देखि ३.२ जीपीए समूहका छन् । उक्त समूहमा ६१५ विद्यार्थी रहेका छन् ।
यस्तै ३.२ देखि ३.६ जीपीए ल्याउने २३७ जना तथा ३.६ देखि ४.० जीपीए ल्याउने २९ जना विद्यार्थी रहेका छन् । त्यसैगरी २.४ देखि २.८ जीपीए ल्याउने ३८९ विद्यार्थी रहेका छन् । भने २.० देखि २.४ जीपीए ल्याउने विद्यार्थी संख्या ४६ रहेको छ ।
१.६ देखि २.० जीपीए समूहमा भने कुनै पनि विद्यार्थी परेका छैनन् । यो बर्ष क्रेटर जोन एकेडेमीमा अध्ययनरत पूजा कार्की जिल्लामै प्रथम भएकी हुन् । उनले सर्वाधिक ३.९१ प्रतिशत जिपीए ल्याएकी छिन् ।
बाजुरामा २०८० सालमा दुई हजार ८३४ जना विद्यार्थी एसइईमा सहभागी भएकामध्ये १ हजार पाँच जना मात्र उत्तीर्ण भएका थिए । त्यस्तै २०८१ सालको एसइई परीक्षामा दुई हजार २१६ जना सहभागी भएकामध्ये १ हजार १९९ जना उत्तीर्ण भएका थिए।विगत दुई बर्षको नतिजा हेर्दा यो बर्ष सुधारोन्मुख देखिएको हो ।