बर्दियामा हत्या आरोपमा महावीर चौधरी पक्राउ, पेस्तोलसहित कैलालीबाट समातिए

दाङको तुलसीपुर उपमहानगरपालिका–५ का २७ वर्षीय निरज चौधरीको हत्या आरोपमा महावीर चौधरी पक्राउ परेका छन्।

जिल्ला प्रहरी कार्यालय कैलाली र इलाका प्रहरी कार्यालय राजापुरको संयुक्त टोलीले बुधबार बिहान कैलारी गाउँपालिका–५ को बैजपुरबाट महावीर चौधरी (५१) लाई पक्राउ गरेको हो। उनी लुम्बिनीका पूर्वमुख्यमन्त्री तथा कांग्रेस नेता डिल्लीबहादुर चौधरीका सहोदर भाइ हुन्।

डिल्लीबहादुर चौधरीले पक्राउको खबर पाएको र महावीर आफ्नो सहोदर भाइ भएको जानकारी दिएका छन्।

घटनास्थल बर्दियाको राजापुरस्थित हमार थारू रेष्टुरेन्टमा निरज चौधरीमाथि गोली प्रहार गरिएको थियो। घाइते अवस्थामा चौधरीलाई नेपालगन्ज उपचारका लागि लगिएको र त्यसपछि प्रहरीले घटना थाहा पाएको थियो। महावीर भने घटनापछि मोटरसाइकलमा कैलालीतर्फ फरार भएका थिए।

राजापुरका प्रमुख प्रहरी नायब उपरीक्षक (डीएसपी) कबिन्द्रसिंह बोहराले कैलाली प्रहरीले समन्वय गरेर महावीरलाई हसुलियाबाट पक्राउ गरेको जानकारी दिए। उनको साथबाट पेस्तोल समेत बरामद भएको छ। पेस्तोल हत्यामा प्रयोग भएको हो कि होइन भन्ने कुरा अनुसन्धान पछि मात्र पुष्टि हुनेछ।

घटनामा संलग्न अन्य व्यक्तिहरू—रेष्टुरेन्ट सञ्चालक बुद्धिप्रसाद चौधरी, उनकी श्रीमती र छोरा राहुल चौधरी—पहिले नै पक्राउ भइसकेका छन्। महावीरले फरार हुँदा प्रयोग गरेको मोटरसाइकल पनि प्रहरीले बरामद गरेको छ।