बुटवलको मोतिपुर–सेमलार खानेपानी संस्थामा रास्वपाको प्यानल विजयी

२९ कात्तिक, बुटवल । मोतिपुर–सेमलार खानेपानी उपभोक्ता संस्थामा भएको निर्वाचनमा राष्ट्रिय स्वतन्त्र पार्टी (रास्वपा) समर्थित समूहले नेपाली कांग्रेस र नेकपा एमालेको संयुक्त प्यानललाई पछाडि पार्दै जित हासिल गरेको छ।

शुक्रबार राति सार्वजनिक परिणामअनुसार १४ सदस्यीय कार्यसमितिमा उपाध्यक्ष, सहसचिव र एक सदस्य बाहेक अन्य सबै पदमा रास्वपा प्यानल सफल भएको छ।

वडा नं. १४, १५ र १९ क्षेत्रका १७ सय उपभोक्ता रहेको संस्थामा १० धारा बराबर एक परिषद् सदस्यका दरले १७१ मतदाताले मतदान गरेका थिए। समितिका संयोजक अधिवक्ता जोखबहादुर खत्रीका अनुसार अध्यक्षतर्फ रास्वपाका कृष्ण थापा ८८ मतसहित निर्वाचित भएका छन् भने प्रतिस्पर्धी पक्षबाट कांग्रेसका नरबहादुर मल्ल ७५ मतमा रोकिएका छन्।

नवनिर्वाचित पदाधिकारीहरूमा वरिष्ठ उपाध्यक्ष गंगाबहादुर पौडेल, उपाध्यक्ष शंकर पौडेल, सचिव मधुप्रसाद घिमिरे, कोषाध्यक्ष छत्रबहादुर खत्री र सहसचिव पृथबहादुर थापा छन्। महिला सदस्यमा राधा कार्की खांण र सीता बस्नेत, अन्य सदस्यतर्फ राजकुमार गौतम र हरिप्रसाद खनाल विजयी भएका छन्। गोलाप्रथाबाट लिलाधर दंगोरिया थारु पनि सदस्य बनेका छन्।

आन्तरिक लेखा समितिमा संयोजक विष्णुप्रसाद पाण्डे र सदस्य लक्ष्मण सेन चयन भएका छन् भने महिला सदस्यतर्फ सरस्वती बुढा गोलाबाट निर्वाचित भएकी छन्।

सचिव घिमिरेका अनुसार उपभोक्ता संस्थामा सबै दलको सहमति हुने प्रस्ताव राख्दा आफूहरूलाई ‘साना दल’ भन्दै बेवास्ता गरिएकोले प्रतिस्पर्धामा उत्रिएको बताएका छन्। उनका अनुसार जितको आधार परिवर्तन चाहने मतदाताको समर्थन हो।

यसअघि नयाँगाउँ खानेपानी संस्थामा पनि रास्वपाले कांग्रेस–एमाले गठबन्धनसँग कडा प्रतिस्पर्धा गरेको थियो, जहाँ उनीहरू ५७ मतले पछि परेका थिए।