पोखरामा कांग्रेस संस्थापन पक्षको भेला : महाधिवेशन मिति र रणनीतिमा मतभेद गहिरिँदै

२६ कात्तिक, पोखरा ।
नेपाली कांग्रेसको संस्थापन पक्षले पार्टीको १५औं महाधिवेशन समयमै गर्नुपर्ने मागसहित पोखरामा दबाबमूलक भेला गरेको छ। उक्त भेलाको संयोजन संस्थापन पक्षका नेता मेखलाल श्रेष्ठ र जित शेरचनले गरेका थिए।

शेरचन हाल बागलुङ कांग्रेस सभापति हुन् भने उनी कृष्णप्रसाद सिटौला निकट नेताका रूपमा परिचित छन्। गण्डकी प्रदेश सभा सदस्यसमेत रहेका शेरचनले सोही पक्षबाट टिकट पाएका थिए।

भेलामा गण्डकी प्रदेशका जिल्ला सभापति र पदाधिकारीहरूको उपस्थिति रहने भनिए पनि अधिकांश वरिष्ठ नेता सहभागी भएनन्। संस्थापन इतर मानिने सभापति शुक्रराज शर्मा र उनका निकट नेताहरू भने भेलामा अनुपस्थित रहे।

भेलामा उठाइएका मागहरूमा क्रियाशील सदस्यता विवाद समाधान गरी समयमै महाधिवेशन गर्नुपर्ने मुख्य विषय थियो। तर, राजनीतिक वृत्तमा यसलाई महामन्त्री गगन थापा र विश्वप्रकाश शर्माको प्रस्तावको प्रतिपक्षमा गरिएको कार्यक्रमका रूपमा पनि व्याख्या गरिएको छ।

मेखलाल श्रेष्ठ र जित शेरचनले भने, “महाधिवेशन हतारमा होइन, तर विवाद टुंग्याएर समयमै गर्नुपर्छ,” भन्ने धारणा राखे।

गण्डकी प्रदेशका अधिकांश पदाधिकारी तथा केन्द्रीय सदस्यहरू भने पुस १६ देखि १९ भित्र नियमित महाधिवेशन वा त्यसअघि विशेष महाधिवेशन गर्नुपर्ने पक्षमा खुलेर बोलेका छन्।

यसैबीच, सभापति शेरबहादुर देउवा निकट केन्द्रीय सदस्यहरू — अर्जुन जोशी, अब्दुर सतार, चिनकाजी श्रेष्ठ, टेकबहादुर गुरुङ, चम्पादेवी खड्का, किशोरदत्त बराल, युवराज जोशी, टकराज गुरुङ, महेन्द्रद्वज जीसी, नन्दप्रसाद न्यौपाने लगायत — सबैले पनि चुनावअगावै महाधिवेशन हुनुपर्ने धारणा सार्वजनिक गरेका छन्।

तनहुँका सभापति जितप्रकाश आलेले भने आफू तटस्थ रहेको र केन्द्रीय समितिको निर्णयपछि मात्रै खुल्ने बताएका छन्।

पूर्वमन्त्री रोमी गौचन (मुस्ताङ) र नर्बु गुरुङ (मनाङ) लगायतका नेताहरू पनि महाधिवेशन चाँडै गर्नुपर्ने पक्षमा उभिएका छन्।

त्यसैगरी, उपसभापति धनराज गुरुङ, सहमहामन्त्री जीवन परियार, कृष्णचन्द्र नेपाली पोखरेल, र केन्द्रीय सदस्य प्रदीप पौडेल, शारदा पौडेललगायत नेताहरू महामन्त्रीद्वयको प्रस्तावको समर्थनमा छन्।

कांग्रेस गण्डकी प्रदेश समितिका सभापति शुक्रराज शर्मा नेतृत्वको टोली, जसमा कल्पना तिवारी, किरणबाबु श्रेष्ठ, विष्णुप्रसाद लामिछाने, रामचन्द्र जोशी, कोपिला रानाभाट, रमेशकुमार पाण्डे लगायत छन्, सबैजना चुनावअघि नै महाधिवेशन हुनुपर्ने धारणा व्यक्त गरेका छन्।

प्रदेशका अधिकांश जिल्ला र क्षेत्रीय सभापतिहरूले पनि सोही निष्कर्ष केन्द्रीय समितिलाई बुझाइसकेका छन्। अब यस विषयमा अन्तिम निर्णय केन्द्रीय तहबाट हुने अपेक्षा गरिएको छ।

उता, संस्थापन पक्षका ७ भाइनिकट नेताहरूले भने पोखरामा भएको भेला “औपचारिक र वैधानिक मागबिनाको कार्यक्रम” भएको बताएका छन्।

चुनाव र महाधिवेशन एकसाथ गर्दा तालमेल मिलाउन कठिन हुने दाबी गर्दै उनीहरूले समय र तयारी पुगेसँगै मात्र अधिवेशन गर्नुपर्ने मत राखेका छन्।

चुनावअगाडि नै महाधिवेशनको माग गर्ने समूहले शनिबार पुनः पोखरामै अर्को भेला गर्ने तयारी गरेको जनाएको छ। यसले नेपाली कांग्रेसभित्र महाधिवेशनको समय निर्धारणलाई लिएर देखिएको आन्तरिक द्वन्द्व अझ गहिरो भएको संकेत गरेको छ।