“विश्वकै नमूना स्वास्थ्य मन्त्रालयको भवन अब प्रयोग असुरक्षित : इन्जिनियरिङ अध्ययनले चेतावनी”

४ असोज, काठमाडौं । जेनजी युवा आन्दोलनको समयमा आगजनीबाट क्षतिग्रस्त भएको स्वास्थ्य मन्त्रालयको भवन अहिले प्रयोग गर्न जोखिमपूर्ण रहेको निष्कर्ष अध्ययन टोलीले निकालेको छ।

शहरी विकास तथा भवन निर्माण विभागको नेतृत्वमा नेपाल इन्जिनियर्स एसोसिएसनसहित विभिन्न इन्जिनियरिङ र आर्किटेक्ट संघका प्रतिनिधिहरूले गरेको प्रारम्भिक अध्ययनले भवनको प्रयोग असुरक्षित भएको देखाएको हो।

नेपाल इन्जिनियर्स एसोसिएसनका अध्यक्ष सुवासचन्द्र बरालका अनुसार, स्वास्थ्य मन्त्रालय भवनका पर्खालहरूमा धेरै क्षति नपुगेको भए पनि स्ल्याबमा ठुलो क्षति पुगेको छ। उनले भने, “लोड बियरिङमा र पर्खालमा धेरै क्षति छैन, तर स्ल्याबहरू पूर्णरूपमा क्षतिग्रस्त भएका छन्, जसले गर्दा अहिले प्रयोग असुरक्षित छ।”

रामशाहपथस्थित यो भवन विश्वभरको आर्किटेक्चरमा उल्लेखनीय मानिन्छ। प्रसिद्ध आर्किटेक्ट लुई कानको शैलीमा पिल्लरविनाको नमुना डिजाइनमा बनेको यो भवनमा आर्किटेक्चर र इन्जिनियरिङको अनौठो मेल देखिन्छ।

भदौ २४ गते जेनजी युवा आन्दोलनको क्रममा आगजनी हुँदा भवनमा व्यापक क्षति पुगेको थियो। त्यसपछि शहरी विकास विभागको समन्वयमा नेपाल इन्जिनियर्स एसोसिएसन, सोसाइटी अफ नेप्लिज आर्किटेक्ट, इलेक्ट्रिकल र मेकानिकल इन्जिनियर्स सोसाइटीको टोलीले अध्ययन गरेको थियो।

सर्वोच्च अदालत, काठमाडौं जिल्ला अदालत, नेपाल बार एसोसिएसन र गुणस्तर तथा नापतौल विभागका भवनहरू पनि अध्ययनपछि प्रयोग गर्न असुरक्षित ठहर भएका थिए। यस किसिमका भवनमा रातो स्टिकर टाँसिएको छ जसले खतराको संकेत गर्दछ।

बरालले जानकारी दिएका छन् कि देशभरका भवनहरूको प्राविधिक परीक्षण जारी छ र यस अध्ययनको नतिजा सरकारलाई बुझाइनेछ। उनी भन्छन्, “केही भवनको एक भागमा धेरै क्षति र अर्को भागमा कम क्षति देखिएको छ, जस्तै सर्वोच्च अदालत भवनको उत्तरतर्फ बढी र दक्षिणतर्फ कम।”