डा. स्वर्णिम वाग्लेले ल्याए प्रत्यक्ष निर्वाचित प्रधानमन्त्री र संसद घटाउने ‘गेम–चेंजर’ प्रस्ताव!

काठमाडौं, साउन २९ – राष्ट्रिय स्वतन्त्र पार्टी (रास्वपा) का उपाध्यक्ष तथा तनहुँ–१ का सांसद डा. स्वर्णिम वाग्लेले शासन प्रणालीमा ठूला संरचनात्मक परिवर्तनका लागि नयाँ योजना सार्वजनिक गरेका छन्। राजधानीदेखि जिल्ला स्तरका विभिन्न कार्यक्रममा बोल्दै उनले हालको शासन प्रणालीलाई ‘अप्रभावकारी’ भन्दै सुधारका लागि स्पष्ट खाका प्रस्तुत गरेका हुन्।

वाग्लेले प्रधानमन्त्रीलाई प्रत्यक्ष जनमतबाट छान्ने व्यवस्था गर्नुपर्ने बताए। उनको प्रस्तावअनुसार, निर्वाचित प्रधानमन्त्रीको नेतृत्वमा १५ सदस्यीय विज्ञ र जनप्रतिनिधि मिश्रित मन्त्रिपरिषद् हुनेछ। संघीय संसदको आकार घटाएर राष्ट्रिय सभामा ३५ मात्र सदस्य राख्ने र स्थानीय तहलाई ७५३ बाट घटाएर ५०० भन्दा कममा सीमित गर्ने उनको सुझाव छ।

उनले हालको सरकारलाई लोकतन्त्र र विकास दुबैका लागि ‘हानिकारक’ ठहर गर्दै तत्काल सुधार आवश्यक रहेको बताए। “सरकार मुद्दा दबाउन र काण्ड छोप्नमै व्यस्त छ,” वाग्लेले कटाक्ष गर्दै भने। साथै, उनले नयाँ सरकार गठनका लागि भित्री वा बाहिरी समर्थनको सम्भावना खुला रहेको पनि संकेत गरे।

शुक्लागण्डकीमा आयोजित कार्यक्रममा वाग्लेले न्यायपालिकाको स्वतन्त्रता र जनअदालतको भूमिकाबारे पनि जोड दिए। हस्ताक्षर अभियान अदालतको काममा हस्तक्षेपका लागि नभएको स्पष्ट गर्दै उनले “सबैभन्दा ठूलो अदालत भनेको जनताको अदालत हो” भन्ने आफ्नो धारणा दोहोर्याए।

उनको यो प्रस्तावलाई पार्टीभित्र र बाहिर दुवै क्षेत्रमा चासोका साथ हेरिएको छ। वाग्लेले चेतावनी दिँदै भने, “संविधान र शासन संरचनामा समयानुकूल सुधार नगरे लोकतन्त्रको गुणस्तर खस्कने खतरा छ।”