नेकपा एमालेको हालै सम्पन्न केन्द्रीय कमिटी बैठकले पूर्वराष्ट्रपति विद्यादेवी भण्डारीको पार्टी सदस्यता नवीकरण नहुने निर्णय गरेपछि, भण्डारीले शुक्रबार पहिलोपटक सार्वजनिक धारणा राखेकी छिन्।
शुक्रबार पत्रकार सम्मेलनमार्फत आफ्ना विचार राख्दै उनले आफू विगत ४५ वर्षदेखि एमालेसँग आबद्ध रहेको र राष्ट्रपतिको जिम्मेवारी पूरा गरेपछि फेरि जनतासँग राजनीतिक रूपमा जोडिन चाहेको स्पष्ट पारिन्।
उनले भनिन्, “ममा कुनै पदप्रति लालसा वा व्यक्तिगत महत्वाकांक्षा छैन। म राष्ट्रको सर्वोच्च पदमा रहेर आफ्नो भूमिका सफलतापूर्वक पूरा गरिसकेकी छु। अहिले मेरो उद्देश्य पार्टी सदस्य भएर पार्टीलाई थप मजबुत बनाउने र देश तथा जनताको सेवामा लाग्ने हो।”
एमालेले सदस्यता नवीकरणमा रोक लगाएको भनिएको सन्दर्भमा उनले स्पष्ट रूपमा भनिन्, “मेरो सदस्यता कसैले खारेज गर्न सक्छ भन्ने लाग्दैन। यस्तो निर्णय गर्ने कुनै उचित कारण पनि छैन।”
उनका अनुसार, राजनीतिक जीवनलाई पुनः सक्रिय बनाएर मुलुकलाई समृद्ध र जनतालाई सुखी बनाउने अभियानमा योगदान गर्न आफू तत्पर रहेको बताइन्।
भण्डारीको यस्तो स्पष्ट वक्तव्यसँगै एमालेभित्रको आन्तरिक छलफल र आगामी रणनीतिमा नयाँ मोड आउने संकेत देखिएको छ।
