ऊर्जा, जलस्रोत तथा सिँचाइ मन्त्रालयका सचिव सुरेश आचार्य र हाइड्रोइलेक्ट्रिसिटी इन्भेष्टमेन्ट एन्ड डेभलपमेन्ट कम्पनी लिमिटेड (एचआईडीसीएल) का प्रमुख कार्यकारी अधिकृत प्रजेश विक्रम थापाबीच आर्थिक वर्ष २०८२/८३ का लागि कार्यसम्पादन करार सम्पन्न भएको छ।
आइतबार मन्त्रालयमा आयोजित औपचारिक कार्यक्रममा सचिव आचार्य र सीईओ थापाबीच सम्झौतापत्रमा हस्ताक्षर गरिएको हो। कार्यक्रममा मन्त्रालयका सहसचिवहरू र कम्पनीका उच्च अधिकारीहरूको उपस्थिति रहेको थियो।
ऊर्जा सचिव आचार्यका अनुसार, चालु आर्थिक वर्षका मुख्य योजनाहरू, हासिल गरिने उपलब्धिहरू र नतिजामूलक सूचकहरूको आधारमा करार गरिएको हो। सम्झौतामा कम्पनीको नीति तथा योजना, लगानीको मोडेल, आयोजना कार्यान्वयन, वित्तीय पारदर्शिता र संस्थागत सुदृढीकरणमा विशेष प्राथमिकता दिइएको छ।
यस करारअनुसार, एचआईडीसीएलले सार्वजनिक–निजी साझेदारीमा आधारित परियोजना प्रवर्द्धन, जलविद्युत् क्षेत्रमा लगानीको विस्तार, आन्तरिक क्षमता विकास र पारदर्शी वित्तीय प्रणाली विकासमा काम गर्नेछ।
ऊर्जा सचिव आचार्यले जलविद्युत् क्षेत्रमा दीर्घकालीन योजना कार्यान्वयनमा एचआईडीसीएलको भूमिका अझ प्रभावकारी हुनुपर्नेमा जोड दिए। “लगानीको वातावरण मजबुत पार्न, सार्वजनिक विश्वास निर्माण गर्न र परियोजनाको वित्तीय व्यवस्थापन पारदर्शी बनाउन कार्यसम्पादन करार महत्वपूर्ण माध्यम हो,” उनले उल्लेख गरे।
कम्पनीका प्रमुख कार्यकारी अधिकृत थापाले संस्थागत उत्तरदायित्व, पारदर्शिता र परिणाममुखी नेतृत्वमा आफू पूर्ण प्रतिबद्ध रहेको बताउँदै जलविद्युत् क्षेत्रमा एचआईडीसीएललाई लगानीको मेरुदण्ड बनाउने लक्ष्य लिएको बताए।
कार्यसम्पादन करारलाई सार्वजनिक संस्थाहरूमा सुशासन र जवाफदेहिता अभिवृद्धिका लागि एक प्रभावकारी अभ्यासका रूपमा लिइएको छ। यसले नेतृत्व र संस्थाबीचको भूमिका स्पष्ट गर्दै नतिजा उन्मुख कार्यशैलीलाई प्रवर्द्धन गर्ने विश्वास गरिएको छ।
