नेपाली कांग्रेसकी सांसद नागिना यादवले बजेट सत्रको व्यस्तताका कारण संसदीय समितिमा विधेयकमाथि छलफल नगर्न आग्रह गरेकी छन्।
मंगलबार सिंहदरबारमा बसेको कानुन, न्याय तथा मानव अधिकार समितिको बैठकमा बोल्दै उनले संसद र बजेटसँग सम्बन्धित कार्यसूची निकै चापमा रहेकाले समितिको बैठक स्थगित गर्नुपर्ने धारणा राखिन्।
उक्त बैठकमा नेपाल कानुन व्यवसायी परिषद् (दोस्रो संशोधन) विधेयक, २०८१ सन्दर्भमा संशोधन प्रस्तावक सदस्यहरूसँग छलफलको कार्यसूची थियो। तर सांसद यादवले सो विधेयकमा संशोधन प्रस्ताव राख्ने सदस्यहरूलाई समेत छलफलमा समुचित समय नदिइने अवस्था आउन सक्ने भन्दै चिन्ता व्यक्त गरिन्।
उनको भनाइमा, बजेट सत्रको समय अत्यन्त व्यस्त हुने भएकाले समितिमा विधेयकमाथि गहिरो छलफल गर्न सकिने वातावरण रहँदैन। यसले विधेयकको गुणस्तरमा असर पर्ने हुँदा त्यसलाई पछि सार्नुपर्ने आवश्यकता रहेको उनले बताइन्।
