प्रतिनिधि सभामा बजेट प्रस्तुत भएको १८ दिनपछि बल्ल छलफल प्रक्रिया सुरु भएको छ।
आइतबारको बैठकमा सभामुख देवराज घिमिरेले राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)को अवरोधबीच पनि बैठक अघि बढाएका हुन्। बैठक सञ्चालन भइरहँदा रास्वपाका सांसदहरू वेल घेरेर नाराबाजी गर्दै विरोध जनाइरहेका थिए।
राप्रपाका सांसदहरूले भने बैठकप्रति असहमति जनाउँदै सिधै बैठक बहिष्कार गरेका छन्।
यसैबीच प्रमुख प्रतिपक्षी दल नेकपा माओवादी केन्द्रसहित सत्ता गठबन्धनका दल नेपाली कांग्रेस र नेकपा एमालेका थुप्रै सांसदहरू बैठकमा अनुपस्थित देखिएका छन्।
बजेटप्रति गम्भीर बहसको समय हुँदा पनि दलहरूबीचको असहज सम्बन्ध र संसदीय उपस्थिति नहुँदा छलफलको प्रभावकारिता प्रभावित देखिएको छ।