इरानी आक्रमणमा इसराइलमा मृत्यु हुनेको संख्या ७ पुग्यो, सयभन्दा बढी घाइते

इरानको मिसाइल आक्रमणबाट इसराइलमा ज्यान गुमाउनेको संख्या ७ पुगेको अन्तर्राष्ट्रिय सञ्चारमाध्यमहरूले जनाएका छन्।

शुक्रबार राति सुरु भएको आक्रमणमा शनिबार राति मात्रै चार जनाको ज्यान गएको अमेरिकी सञ्चार संस्था सीएनएनले जनाएको छ। इरानबाट प्रहार गरिएको मिसाइलका टुक्राहरू उत्तरी इसराइलमा जमिनमा खस्दा अन्दाजी ४० वर्षका दुई महिला, २० वर्षीया युवती र १३ वर्षीया किशोरीको मृत्यु भएको हो।

यसअघि शुक्रबार राति पनि तीन जनाको मृत्यु भएको थियो। इसराइलको आपतकालीन सेवा निकाय म्यागेन डेभिड एडोमका अनुसार तेल अभिभको दक्षिणमा पर्ने रिशोन लेजियोन क्षेत्रमा इरानी क्षेप्यास्त्रले घर भत्काउँदा दुई जनाको ज्यान गएको हो। उनीहरू भत्किएको घरको भग्नावशेषमा परेका थिए।

तेल अभिभकै पूर्वी सहर रमात गानको दान क्षेत्रमा इरानी आक्रमणका टुक्रा खस्दा एक महिलाको ज्यान गएको बताइएको छ। घटनामा अन्य केही मानिसहरू घाइते भएका छन्।

सीएनएनका अनुसार इरानी आक्रमणमा इसराइलमा एक सयभन्दा बढी व्यक्ति घाइते भएका छन्।

यता, इरानभित्र पनि मानवीय क्षति भएको जानकारी सार्वजनिक भएको छ। पछिल्लो विवरण अनुसार, कम्तीमा ८० जनाको मृत्यु र ३०० भन्दा बढी घाइते भएका छन्। मृत्यु हुनेमा उच्चपदस्थ सैनिक, आणविक वैज्ञानिक, एक नेतासहित सर्वसाधारण नागरिकहरू रहेका छन्।