प्रहरी बजेटमा उल्लेख्य वृद्धि : गृहमन्त्री लेखक

गृहमन्त्री रमेश लेखकले आगामी आर्थिक वर्षको बजेटमा नेपाल प्रहरीतर्फ उल्लेखनीय वृद्धि गरिएको बताएका छन्। अनुसन्धानकर्ता प्रहरी र सरकारी वकिलहरूको तेस्रो राष्ट्रिय सम्मेलनको उद्घाटन गर्दै उनले देशको सिमित श्रोत-साधनका बीच पनि तुलनात्मक रूपमा प्रहरी क्षेत्रका लागि बढी बजेट विनियोजन गरिएको जानकारी दिए।

उनका अनुसार यसअघिका वर्षहरूमा ८–९ महिनाका लागि मात्रै तलब, पोसाक र रासनको व्यवस्था हुँदै आएकोमा यसपालि पूरै वर्षका लागि आवश्यक बजेट एकमुष्ट रूपमा छुट्याइएको छ। यसले अर्थ र गृह मन्त्रालयबीच विगतमा देखिने जटिलता हटाउने विश्वास उनले व्यक्त गरे।

गृहमन्त्री लेखकले अनुसन्धानमा प्रविधिको प्रयोग, शान्ति–सुरक्षा कायम गर्ने, कानुन र व्यवस्थाको कार्यान्वयनका लागि आवश्यक सामग्रीहरूको अभाव नहुने गरी बजेट व्यवस्था गरिएको बताए। साथै, अबको प्राथमिकता प्रविधिमैत्री अनुसन्धान प्रणालीलाई सुदृढ गर्दै प्रहरी सेवा अझ भरपर्दो, पारदर्शी र सक्षम बनाउनु रहेको स्पष्ट पारे।

उनले भने, “अब स्रोत–साधनको अभाव हुँदैन, तर त्यसअनुसार नतिजा पनि देखिनुपर्छ।” गृहमन्त्रीले अनुसन्धान प्रक्रियामा प्रविधिको बढीभन्दा बढी प्रयोग गर्दै पारदर्शिता र विश्वसनीयता कायम राख्नुपर्ने आवश्यकता औंल्याए।