भारत । भारतको राष्ट्रवादी कांग्रेस पार्टी (एनसीपी) का नेता बाबा सिद्दिकीको गोली हानी हत्या भएको छ ।

मुम्बईको बान्द्रामा आक्रमणकारीले गयराति उनीमाथि दर्जनौं गोली प्रहार गरेर हत्या गरेका हुन् ।

छोरा जीशान सिद्दिकीको कार्यालय बाहिर बान्द्रा (पूर्व) को निर्मल नगरको कोलगेट मैदान नजिकै रहेका बेला उनीमाथि गोली प्रहार भएको भारतीय सञ्चारमाध्यमहरूले जनाएका छन् ।

प्रहरीले दुई जना शंकास्पद व्यक्तिलाई नियन्त्रणमा लिएको छ । बाबा सिद्दिकीले महाराष्ट्र विधानसभामा बान्द्रापश्चिमबाट तीन पटक प्रतिनिधित्व गरेका थिए ।

यसै वर्ष उनी कांग्रेस छाडेर राष्ट्रवादी कांग्रेस पार्टी (एनसीपी) मा प्रवेश गरेका थिए ।

गोली प्रहारबाट गम्भीर घाइते भएका उनलाई लीलावती अस्पतालमा भर्ना गरिएको थियो । गम्भीर घाइते भएका सिद्दिकीलाई तत्कालै चिकित्सकले मृत घोषणा गरेका थिए ।

सिद्दिकीले करिब पाँच दशक कांग्रेसमा रहेर राजनीति गरेका थिए।

बाबा सिद्दिकीले बलिवुडका दुई सुपरस्टार सलमान खान र शाहरुख खानबीचको झगडा अन्त्य गराएका थिए । ईदका समयमा उनले आयोजन गर्ने इफ्तार पार्टी बलिवुडको प्रसिद्ध पार्टी मानिन्छ ।

उनको निधनको खबर सुने लगतै बलिवुड अभिनेता सलमान खान, शिल्पा सेट्ठी लगायतका बलिवुड सेलिब्रेटी लिलावती अस्पताल पुगेका छन् ।