भारतीय उद्योगपति रतन टाटाको निधन

भारत । भारतीय उद्योगपति रतन टाटाको निधन भएको छ । टाटा सन्सका भूतपूर्व अध्यक्ष रतन टाटाको बुधवार साँझ मुम्बईस्थित क्यान्डी अस्पतालमा ८६ वर्षको उमेरमा उपचारको क्रममा निधन भएको हो ।

टाटालाई वृद्धावस्थासँगै देखिने कमजोर स्वास्थ्य अवस्थाका कारण अस्पताल भर्ना गरिएको उनको पारिवारिक स्रोतले जनाएको छ । अस्पताल स्रोतका अनुसार उनलाई उच्च रक्तचापको समस्या थियो ।

सन् १९३७ डिसेम्बर २८ मा मुम्बईमा जन्मिएका टाटा रतन टाटा ट्रस्ट र दोराबजी टाटा ट्रस्टका अध्यक्ष भएका थिए । उनी सन् १९९१ देखि सन् २०१२ मा सेवानिवृत्त हुनुअघिसम्म टाटा समूहको ‘होल्डिङ कम्पनी’ टाटा सन्सको अध्यक्ष भएका थिए ।

सन् २००८ मा उनलाई देशको दोस्रो सर्वोच्च नागरिक पुरस्कार पद्म विभूषणबाट सम्मानित गरिएको थियो ।

उनको निधनप्रति राष्ट्रपति द्रोपदी मुर्मू, उपराष्ट्रपति जगदीप धनखर, प्रधानमन्त्री नरेन्द्र मोदी, विपक्षी दलका नेता राहुल गान्धी, विभिन्न राज्यका मुख्यमन्त्रीलगायतले दुःख व्यक्त गर्दै उनीप्रति श्रद्धाञ्जलि अर्पण गरेका छन् ।

उनको राजकीय सम्मानका साथ अन्त्येष्ठि गरिने छ ।