शिक्षाले ज्ञानसँगै विनम्रता र नैतिकताको विकास गर्न सघाउँछ : उपराष्ट्रपति

काठमाडौं । उपराष्ट्रपति रामसहाय प्रसाद यादवले शिक्षा केवल ज्ञान हासिल गर्ने माध्यम मात्र नभई नम्रता, अनुशासन र सामाजिक उत्तरदायित्व विकास गर्ने आधार भएको बताएका छन् ।

आइतबार मदन भण्डारी मेमोरियल कलेजको २५औँ वार्षिकोत्सव तथा रजत जयन्ती समारोमा बोल्दै उनले २५ वर्षको यात्रा कुनै पनि शैक्षिक संस्थाका लागि समयको गणना मात्र नभई संकल्प, साधना र राष्ट्र निर्माणमा पु¥याएको योगदानको स्मरण र आत्मसमीक्षा गर्ने अवसर रहेको बताएका हुन् ।

उनले भने, ‘२५ वर्षको यात्रा कुनै पनि संस्थाका लागि केवल समयको गणना मात्र होइन । यो संकल्प, साधना र राष्ट्र निर्माणमा पुर्याएको योगदानको स्मरण र आत्मसमीक्षा गर्ने अवसर पनि हो । यसले भविष्यमा अझ सकारात्मकता र दृढ संकल्पसहित अघि बढ्न प्रेरणा दिन्छ ।’

उनले कलेज परिवार, पूर्वविद्यार्थी, अभिभावक, शिक्षक तथा विद्यार्थीलाई शुभकामना व्यक्त गर्दै विगत २५ वर्षमा कलेजले सक्षम, अनुशासित र जिम्मेवार नागरिक उत्पादन गर्दै राष्ट्र निर्माणमा उल्लेखनीय योगदान दिएको विश्वास व्यक्त गरे ।

यादवले संस्कृत श्लोक ‘विद्या ददाति विनयम्’ उद्धृत गर्दै शिक्षाले ज्ञानसँगै विनम्रता र नैतिकताको विकास गर्ने बताए ।

उनले भने, ‘संस्कृत श्लोकमा भनिएको छ, ‘विद्या ददाति विनय’ यसको अर्थ शिक्षाले केवल ज्ञान मात्र होइन, नम्रता, अनुशासन र सामाजिक उत्तरदायित्व पनि दिन्छ । नेपाल जस्तो बहुजातीय, बहुभाषिक र बहुसांस्कृतिक मुलुकमा शिक्षा नै सामाजिक सद्भाव, समानता र राष्ट्रिय एकताको आधार हो ।’

नेपाल जस्तो बहुजातीय, बहुभाषिक र बहुसांस्कृतिक मुलुकमा शिक्षा नै सामाजिक सद्भाव, समानता र राष्ट्रिय एकताको आधार भएको उल्लेख गरे ।

‘प्रविधि, कृत्रिम बुद्धिमत्ता, डिजिटल नवाचार र विश्वव्यापी प्रतिस्पर्धाको यो युगमा हामीले हाम्रो आधारभूत मूल्य र नैतिकतासँग जोडिदै विश्वस्तरमा प्रतिस्पर्धा गर्नुपर्छ । युवाहरूको सफलता नै हाम्रो देशको सुनौलो भविष्यको आधार स्तम्भ हो,’ उनले भने ।

उनले प्रविधि, कृत्रिम बुद्धिमत्ता, डिजिटल नवाचार र विश्वव्यापी प्रतिस्पर्धाको युगमा आधारभूत मूल्य र नैतिकतालाई आत्मसात् गर्दै विश्वस्तरमा प्रतिस्पर्धा गर्नुपर्ने बताए । शिक्षकहरूलाई राष्ट्र निर्माणका अभियन्ता भन्दै उनले शिक्षकहरूले विद्यार्थीलाई सक्षम नागरिकका रूपमा तयार पारेर समाजमा सकारात्मक परिवर्तन ल्याइरहेको बताए ।