उपाध्यक्ष शाक्यको कडा चेतावनी : ‘महिलाप्रति अपमानजनक शब्द प्रयोग सह्य हुँदैन

२३ मंसिर, काठमाडौं ।
नेकपा एमालेकी उपाध्यक्ष अष्टलक्ष्मी शाक्यले पार्टी अध्यक्ष केपी शर्मा ओलीमाथि महिलाप्रति अपमानजनक व्यवहार गरेको आरोप लगाएकी छन्।

एमालेको ११ औँ महाधिवेशनको सन्दर्भमा मंगलबार आयोजित अन्तरसंवाद कार्यक्रममा शाक्यले भनिन्, “पूर्वराष्ट्रपति विद्या भण्डारीलाई अपमानजनक शब्द प्रयोग गर्नु अनुचित र अस्वीकार्य हो। महिलालाई अपमान गर्ने नेतृत्व अबको आवश्यकता छैन।”

उनका अनुसार, देशको आधाभन्दा बढी जनसंख्या महिलाले ओगटेको अवस्थामा महिला हिंसा र अवमूल्यन विरुद्ध निरन्तर आवाज उठाउनु अपरिहार्य छ, तर ओलीले पटक–पटक अपमानजनक शब्द प्रयोग गरेकाले सशक्त प्रतिकार आवश्यक छ।

शाक्यले थपिन्, “पूर्वराष्ट्रपति, संविधान संरक्षक र देशको सम्मानजनक व्यक्तिलाई यस्तो शब्द प्रयोग गर्नु नेतृत्वको मर्यादासँग मेल खाँदैन। यो प्रकारको व्यवहार कुनै पनि नेताले गर्न हुँदैन।”

उनले महिलाप्रति अपमान र अवमूल्यन गर्ने प्रवृत्तिविरुद्ध अब ढिलो नगरी तत्काल आवाज उठाउनुपर्छ भन्दै चेतावनी दिइन्। शाक्यले भनिन्, “यस्तो नेतृत्व अवको आवश्यकता होइन। महिलाको सम्मान गर्ने, समावेशी र मर्यादित नेतृत्व आवश्यक छ।”