विरलै देखिने भव्य सिग्नेचर पुल : तिनाउ नदीमा आधुनिक संरचना निर्माण प्रक्रिया औपचारिक रूपमा सुरु

१९ मंसिर, बुटवल । तिनाउ नदीमाथि आधुनिक र कलात्मक संरचना सहितको सिग्नेचर ब्रिज निर्माण प्रक्रिया आधिकारिक रूपमा अघि बढेको छ । सडक विभाग अन्तर्गत विकास सहयोग कार्यान्वयन महाशाखाले पुल निर्माणका लागि ठेक्का आव्हान जारी गरेको जानकारी दिएको छ ।

यो पुलको आर्किटेक्चर र संरचनागत नक्सा नेपाल, चीन, भारत र स्विजरल्याण्डका पूर्वाधार विज्ञहरूको संयुक्त परामर्शपछि तयार गरिएको हो । पूर्व–पश्चिम राजमार्ग सञ्चालनमा आएपछि सन् १९८१ तिर बनेको पुरानो पुल साँघुरो र क्षमताभन्दा बढी उपयोग हुन थालेपछि नयाँ संरचना आवश्यक देखिएको थियो ।

बुटवल उपमहानगरपालिकाले जग्गा व्यवस्थापन तथा प्रक्रिया सहज बनाउने भूमिका निभाएको बताइएको छ । पुरानो पुल भत्काउनुपर्ने छैन, त्यसको छेउमै बन्ने नयाँ पुल ४२१ मिटर लम्बाइ र ४ लेन क्षमतासहित निर्माण हुने अनुमान गरिएको छ ।

डिजाइनसँगै नदी किनारको सौन्दर्यीकरण

पुल निर्माणसँगै नदी किनारमा चेकड्याम, कृत्रिम तालाउ, हरियाली बगैँचा, विश्राम कक्ष, झिलिमिली प्रकाश, क्याफे र सन्ध्या आरती जस्ता आकर्षण राखिने प्रस्ताव डिजाइनमा समेटिएको छ ।

यसले महेन्द्र राजमार्गका यात्रु मात्र होइन जितगढी किला, युद्ध सङ्ग्रहालय, बुटवल पुरानो बस्ती, मन्दिर तथा मस्जिद छेउछाउ घुम्न आउने पर्यटकलाई नयाँ गन्तव्य प्रदान गर्ने अपेक्षा गरिएको छ ।

विश्व बैक दक्षिण एसिया सहरी विकास एकाइको सहयोगमा अघि बढिएको यो परियोजनाको आर्किटेक्चर डिजाइन भारतस्थित अन्तर्राष्ट्रिय कम्पनी टोटल सिनर्जी कन्सल्टिङ ले तयार गरेको हो भने संरचनागत डिजाइन स्विस डेभलपमेन्ट कोअपरेशन को सहकार्यमा बनेको हो ।

सिग्नेचर ब्रिज किन विशेष ?

• कलात्मक तथा पहिचान दिने आधुनिक पुलको स्वरूप

• स्टिल र उच्चस्तरीय कङ्क्रिट सामग्रीको उपयोग

• पाइलोन र डेक मुख्य आधार

• हेर्दा आकर्षक, पर्यटनमुखी र आधुनिक सहरको चिनारी

प्राविधिकहरूका अनुसार यस प्रकारको पुल निर्माणभन्दा पहिले माटो परीक्षण, भू–अध्ययन, वातावरणीय प्रभाव मूल्यांकन अनिवार्य हुन्छ । ठूलो क्रेन र विशेष उपकरण आवश्यक पर्ने भएकाले निर्माण चुनौतीपूर्ण मानिन्छ ।

सडक कार्यालय बुटवलका प्रमुख जिवेन्द्र मिश्रका अनुसार, सिग्नेचर ब्रिजले तिनाउ छेउको करिब तीन सय मिटर क्षेत्रमा समेत दृश्यात्मक सौन्दर्य थप्ने बताइएको छ । टेन्डर प्रक्रिया अघि बढेसँगै, आवश्यक भए डिजाइनमा केही परिवर्तन हुन सक्ने सम्भावना पनि खुला राखिएको छ ।