ट्रम्पद्वारा भेनेजुएलाका राष्ट्रपति मदुरोसँग सम्भावित वार्ताको सङ्केत

अमेरिकी राष्ट्रपति डोनाल्ड ट्रम्पले आइतबार भेनेजुएलाका समकक्षी निकोलस मदुरोसँग निकट भविष्यमा वार्ता हुन सक्ने सङ्केत दिनुभएको छ । क्यारिबियन क्षेत्रमा अमेरिकी सैन्य गतिविधि तीव्र बनेपछि क्षेत्रीय तनाव बढिरहेको अवस्थामा उहाँको यस्तो अभिव्यक्ति आएको हो । ट्रम्पले भन्नुभएको थियो, “हाम्रा प्रतिनिधिहरूले मदुरोसँग केही विषयमा छलफल गर्दै हुन सक्छन् । त्यो प्रक्रियाको परिणाम कुन दिशामा जान्छ, अहिले भन्न सकिँदैन । तर उहाँहरूले कुरा गर्न चाहना व्यक्त गर्नुभएको छ ।” पत्रकारहरूले थप विवरण माग्दा उहाँले भन्नुभयो, “भेनेजुएला संवादको इच्छुक छ । यसको ठ्याक्कै अर्थ के हो, म निश्चित छैन । म सबैसँग कुरा गर्न तयार छु ।” यसअघि, अमेरिकी विदेश मन्त्रालयले मदुरोको नेतृत्वमा रहेको दाबी गरिएको ‘कार्टेल डे लस सोल्स’ लाई विदेशी आतङ्कवादी सङ्गठन (एफटिओ) का रूपमा सूचीबद्ध गर्ने निर्णय सार्वजनिक गरेको थियो । विदेशमन्त्री मार्को रुबियोले जारी गर्नुभएको विज्ञप्तिमा उक्त कार्टेलसहित अन्य तोकिएको एफटिओहरूले अमेरिकामा लागुऔषध तस्करी बढाएको र क्षेत्रीय आतङ्कवादी गतिविधिमा भूमिका खेलेको दाबी गरिएको छ । नोभेम्बर २४ बाट लागू हुने यो सूचीकरण क्यारिबियन क्षेत्रमा हालै बढाइएको अमेरिकी सैन्य परिचालनसँग संलग्न छ । वासिङ्टनले यसलाई लागुऔषध तस्करी नियन्त्रणका लागि आवश्यक भन्दै आएको छ । तर काराकासले भने यो कदम राष्ट्रपति मदुरोको सत्ता फाल्न अमेरिकी प्रयासको हिस्सा भएको आरोप लगाएको छ । मदुरोलाई वासिङ्टनले अवैध नेता र लागुऔषध कारोबारमा संलग्न व्यक्ति भनेर आरोप लगाउँदै आएको छ । उक्त आरोपलाई उहाँले अस्वीकार गर्दै आउनुभएको छ । रुबियोले आइतबार कार्टेल डे लस सोल्सको नेतृत्व मदुरो र उहाँका वरिष्ठ अधिकारीहरूले गर्दै आएका छन्, जसले ‘भेनेजुएलाको सेना, गुप्तचर निकाय, विधायिका र न्यायपालिकालाई गम्भीर रूपमा भ्रष्ट बनाएका छन्’ भनी पुनः दाबी गर्नुभयो । उहाँले भन्नुभयो, “मदुरो वा उहाँका सहयोगीहरूले भेनेजुएलाको वैध सरकारको प्रतिनिधित्व गर्दैनन् ।” अमेरिकी अर्थ मन्त्रालयले यसअघि पनि कार्टेल डे लस सोल्समाथि तिनीहरूले अन्य अपराध समूहहरूलाई ‘भौतिक सहयोग’ गरेको आरोपमा प्रतिबन्ध लगाइसकेको छ । यसैबीच अमेरिकाले क्यारिबियन तथा पूर्वी प्रशान्त दुवै क्षेत्रमा ‘अपरेसन साउदर्न स्पियर’ नामक कडा नियन्त्रण अभियान सञ्चालन गरिरहेको छ । एएफपीले सार्वजनिक गरेको तथ्याङ्कअनुसार सेप्टेम्बरमा मानव तस्करीविरुद्धको सैन्य अभियान सुरु भएदेखि अमेरिकी सेनाले समुद्री क्षेत्रमा लागुऔषध ओसारपसारमा संलग्न भएको आरोपमा कम्तीमा ८३ जनाको मृत्यु गराएको छ । तर अमेरिकाले ती लक्ष्यहरू वास्तवमा तस्कर नै थिए कि थिएनन् भन्ने विस्तृत विवरण सार्वजनिक गरेको छैन । विज्ञहरूले यस्तो कारबाहीलाई गैरन्यायिक हत्याको रूपमा हेर्नुपर्ने टिप्पणी गरेका छन् । अमेरिकी नौसेनाले आइतबार युएसएस जेराल्ड आर. फोर्ड विमानवाहक जहाज क्यारिबियन सागरमा तैनाथ रहेको पुष्टि गरेको छ । यससँगै दुई निर्देशित मिसाइल विध्वंसक जहाज तथा अन्य सहयोगी जहाज र विमानहरूसमेत परिचालनमा छन् । यो घोषणा पूर्वी प्रशान्त क्षेत्रमा गरिएको पछिल्लो अमेरिकी आक्रमणको एक दिनपछि आएको हो । उक्त आक्रमणमा तीन जनाको मृत्यु भएको थियो ।