ट्रम्पले सर्जियो गोरलाई भारतका लागि नयाँ अमेरिकी राजदूत र दक्षिण–मध्य एशियाका विशेष दूत बनाउने तयारी

काठमाडौं, ७ भदौ । अमेरिकी राष्ट्रपति डोनाल्ड ट्रम्पले सर्जियो गोरलाई भारतका लागि नयाँ अमेरिकी राजदूत र दक्षिण तथा मध्य एशियाका मामिलाका विशेष दूतको रूपमा नियुक्त गर्ने तयारी गरिरहेका छन्।

हाल गोर ट्रम्प प्रशासनको ‘हेड अफ प्रेसिडेन्शियल पर्सनल अपोइन्टमेन्ट्स’मा कार्यरत छन्। राष्ट्रपति ट्रम्पले सामाजिक सञ्जाल ट्रुथ सोसलमा घोषणा गर्दै गोरलाई लामो समयदेखि आफ्नो विश्वासपात्र र सहयोगी भएको उल्लेख गरेका छन्। ट्रम्पका अनुसार, गोरले प्रशासनका विभिन्न विभागमा लगभग ४ हजार “अमेरिका फर्स्ट” समर्थकलाई नियुक्त गर्न महत्वपूर्ण भूमिका खेलेका छन्।

तर, गोरको नियुक्ति अमेरिकी सिनेटको स्वीकृतिबाट हुन बाँकी छ।

गोरको नियुक्ति भन्सार शुल्क वृद्धिका कारण भारतसँग बढ्दै गएको तनावको बीचमा आइरहेको छ। हाल ट्रम्प प्रशासनले भारतमाथि ५० प्रतिशत भन्सार शुल्क लागू गर्ने निर्णय गरिसकेको छ, जसले दुई देशबीचको सम्बन्धमा थप जटिलता थपेको छ।

सर्जियो गोरले सामाजिक सञ्जाल एक्समा लेख्दै, “राष्ट्रपति ट्रम्पले मलाई भारतका लागि राजदूत र दक्षिण–मध्य एशियाका विशेष दूतको जिम्मेवारी दिएका छन्, यसमा मैले पूर्ण विश्वास र आभार व्यक्त गर्दछु।”

गोरको कार्यशैली विवादास्पद रहँदै आएको छ। यसै वर्ष प्रारम्भमा उनले टेस्ला र स्पेसएक्सका प्रमुख इलोन मस्कसँग ट्रम्प प्रशासनबीचको विवादमा भूमिका खेलेको बताइन्छ। मस्कले उनलाई ‘सर्प’ भनेर पनि उल्लेख गरेका थिए।

विश्लेषकहरूले भने, गोरको नियुक्ति भारत–पाकिस्तान सम्बन्धमा अमेरिकाको दृष्टिकोणलाई एकरूप बनाउन सहयोग पुग्ने र दक्षिण–मध्य एशियामा अमेरिकी प्राथमिकता स्पष्ट गर्नेछ भन्ने अनुमान गरेका छन्।

गोरको पृष्ठभूमि

३९ वर्षका गोर भारतका लागि नियुक्त हुने अहिलेसम्मका कान्छा अमेरिकी राजदूत हुनेछन्। उनको पूरा नाम गोरोकोभ्स्की हो। सन् १९८६ मा तत्कालीन सोभियत संघको उजबेकिस्तानमा जन्मेका गोर परिवारसहित १९९९ मा अमेरिका आएका थिए।

उनका पिता सोभियत सेनाका लागि विमान इन्जिनियर थिए भने आमा इजरायली मूलकी हुन्। गोरले लस एन्जेलस उपनगरमा उच्च शिक्षा हासिल गरेका थिए र पछि वासिङ्टन डीसीको जर्ज वासिङ्टन विश्वविद्यालयमा अध्ययन गरेका थिए।

सन् २००८ मा उनले रिपब्लिकन उम्मेदवार जोन म्याककेनको अभियानमा सक्रिय भूमिका निभाएका थिए।

अमेरिकाले पछिल्लो पटक सन् २०२३ मा एरिक गार्सेटीलाई भारतको राजदूत बनाएको थियो, जो जनवरी २०२५ मा कार्यकाल सक्दा फर्केका थिए। गार्सेटीको कार्यकालपछि भारतमा अमेरिकाको राजदूत पद खाली रहेको थियो।