शपथपछि सक्रियता: गभर्नर पौडेलको पहिलो निर्णय—पाँच सय र हजारका नोट छपाइ

७ जेठ, काठमाडौं । नेपाल राष्ट्र बैंकका नवनियुक्त गभर्नर डा. विश्वनाथ पौडेलले बुधबार औपचारिक रूपमा कार्यभार सम्हालेका छन्। राष्ट्र बैंकको केन्द्रीय कार्यालय पुगेर उनले पदभार ग्रहण गरेका हुन्।

गभर्नरका रूपमा पहिलो निर्णयस्वरूप उनले पाँच सय र एक हजार दरका नयाँ नोट छपाइको प्रस्तावमा हस्ताक्षर गरेका छन्।

पदभार ग्रहणपछि सञ्चारकर्मीहरूसँग कुरा गर्दै गभर्नर पौडेलले मौद्रिक नीति र सरकारको वित्तीय नीति अलग–अलग धारहरू भएको प्रष्ट पारे। उनका अनुसार, “मौद्रिक नीति वित्तीय नीतिको अधीनमा होइन, यो स्वतन्त्र नीति हो। तर यदि सरकारको नीति कार्यान्वयनमा यसले अवरोध गरिरहेको देखिएमा आवश्यक परिमार्जन गरिनेछ।”

राष्ट्र बैंकका कार्यकारी निर्देशक तथा गभर्नरका आकांक्षी रहेका गुणाकर भट्टको राजीनामा बारेमा भने उनले यो संस्था भित्रको आन्तरिक विषय भएको प्रतिक्रिया दिए।

गभर्नर पौडेलले वित्तीय प्रणालीको सुदृढीकरणका लागि नियमनभन्दा पनि सुपरीवेक्षण क्षमतालाई बलियो बनाउनु पर्ने धारणा राखे। साथै, देशको वर्तमान आर्थिक अवस्थालाई मध्यनजर गर्दै उपयुक्त कर्जा नीति ल्याउने तयारी भइरहेको पनि उनले स्पष्ट पारे।

उनले थपे, “हाम्रा नीति निर्माण प्रक्रियाहरू सबै सरोकारवालासँग व्यापक परामर्शपछि मात्र अघि बढाइनेछ।”