नेपाली महिला क्रिकेटमा नयाँ इतिहास रचिँदा कप्तान इन्दु बर्माले उत्साह र गर्व व्यक्त गरेकी छन्।

नेपालले सोमबार युएईलाई पाँच विकेटले पराजित गर्दै महिला टी-२० विश्वकपको एसिया छनोट पार गरेर पहिलो पटक ग्लोबल छनोटमा स्थान सुरक्षित गरेको हो। यो सफलतालाई कप्तान इन्दुले ‘सपना जस्तै उपलब्धि’ भन्दै समर्पण, परिश्रम र एकताले सम्भव भएको बताएकी छन्।

“खेल निकै तनावपूर्ण थियो,” इन्दुले भनिन्, “तर हामीले अन्तिम क्षणसम्म धैर्य गुमाएनौं। हरेक खेलाडीको समर्पणले जित सम्भव बनायो।”

महत्त्वपूर्ण खेलमा कप्तानले अविजित ३० रन बनाउँदै टोलीलाई जितको गोरेटोमा हिँडाइन्। यता, बलिङतर्फ प्रभावशाली प्रदर्शन गरेकी मनिषा उपाध्यायले विपक्षी टोलीको कप्तानसहित चार विकेट झारेर विपक्षीलाई सशक्त स्कोर बनाउनबाट रोकिन्।

इन्दुले खेलपछि आफ्नो ‘प्लेयर अफ द म्याच’को उपाधि बलर मनिषालाई समर्पण गर्दै भनिन्, “उहाँको योगदान विना यो सम्भव थिएन।”

नेपालको यो जितले महिला क्रिकेटमा नयाँ उत्साह थपिएको छ। अब नेपाली टोलीले ग्लोबल स्तरको प्रतिस्पर्धामा भाग लिनेछ, जहाँ अझ ठूलो चुनौतीसँग जुध्नुपर्नेछ।

“हामी अझै धेरै सुधार गर्न चाहन्छौं,” इन्दु भन्छिन्, “तर अहिलेको लागि यो उपलब्धि सबै नेपालीका लागि गर्वको क्षण हो।”

नेपालको क्रिकेट इतिहासमा यो उपलब्धिलाई दीर्घकालीन सफलता तर्फको एक महत्वपूर्ण पाइला मानिएको छ।