सरकार परिवर्तन हुँदैन, संक्रमणकालीन न्यायको प्रक्रिया निष्कर्षमा पुग्छः गृहमन्त्री लेखक

काठमाडौँ — गृहमन्त्री रमेश लेखकले वर्तमान सरकार नेपाली कांग्रेस र नेकपा एमालेबीचको सहमतिअनुसार अघि बढ्ने स्पष्ट पारेका छन्। ललितपुरमा आयोजित एक कार्यक्रममा बोल्दै उनले सरकारको दिशा तय भइसकेको बताएका हुन्।

मन्त्री लेखकले आफूले गृहमन्त्रीको जिम्मेवारी सम्हालेको दस महिना पुगेको जानकारी दिँदै, यो समय कुनै सरकार परिवर्तन हुने चरण होइन भन्ने दाबी गरे। उनले अघिल्लो अवस्थाको जस्तै १० महिनामा सरकार फेरिने परिस्थिति अहिले नभएको उल्लेख गरे।

‘यो पटक दसै महिनामा सरकार परिवर्तन हुँदैन,’ मन्त्री लेखकले भने, ‘यस्ता दस महिना त हामीले तीन-चार पटक भोगिसकेका छौं। त्यसैले यो समय धेरै ठान्नुहुन्न।’

उनले संक्रमणकालीन न्यायको सन्दर्भमा आवश्यक कानुनी पूर्तिका कामहरू सम्पन्न भइसकेको जानकारी दिए। अघिल्लो नौ महिनाको अवधिमा सरकार संक्रमणकालीन न्यायसँग सम्बन्धित कानुनी खाँचोलाई पूर्णता दिन सफल भएको उनले बताए।

गृहमन्त्रीका अनुसार मुलुकमा स्थायित्व, सुशासन, र पीडितको न्याय सुनिश्चित गर्न सरकारले गम्भीर पहल गरिरहेको छ। सिफारिस समितिले आफ्नो काम अगाडि बढाइसकेको जानकारी दिँदै उनले समितिलाई स्वतन्त्र, निष्पक्ष र पारदर्शी रूपमा काम गर्न दिनुपर्नेमा जोड दिए।

पीडितको सहभागिताबिना संक्रमणकालीन न्यायको प्रक्रिया निष्कर्षमा पुग्न नसक्ने उल्लेख गर्दै मन्त्री लेखकले पीडित समन्वय इकाइको गठन ऐनमै गरिएको र त्यसलाई नियमावलीमार्फत थप स्पष्ट पारिने बताए।

उनले भने, ‘हामीले बनाएको नयाँ संशोधनमा पीडित समन्वय इकाइ राखिएको छ। अब यसलाई नियमावलीमा अझै प्रष्ट पारौँ, थप आवश्यक व्यवस्था गरौँ। पीडितको आवाज र सहभागिता नै न्यायको मूल आधार हो।’