यू–१९ विश्वकप छनोटमा नेपालद्वारा यूएईलाई २०१ रनको चुनौती, कप्तान नरेनको चम्किलो अर्धशतक

आईसीसी यू–१९ विश्वकप एसिया छनोट अन्तर्गतको पहिलो खेलमा नेपालले यूएईलाई २०१ रनको लक्ष्य दिएको छ। वर्षाले प्रभावित खेल ४० ओभरमा सिमित गरिएपछि टस हारेर पहिला ब्याटिङ गरेको नेपालले ९ विकेटको क्षतिमा २०० रन बनायो।

कप्तान नरेन भट्टले जिम्मेवारीपूर्ण पारी खेलेर टिमलाई सम्मानजनक स्कोरमा पुर्‍याउन मुख्य भूमिका निर्वाह गरे। उनले ७५ बलमा ७ चौकाको मद्दतले ६७ रन जोडे। ओपनर साहिल पटेलले ३२ रन जोड्दा, दिलसाद अलीले ३४ रनको योगदान दिए।

यूएईका उदिस सुरीले प्रभावशाली बलिङ गर्दै ८ ओभरमा २६ रन खर्चिएर ३ विकेट हात पारे। युग शर्मा र शालोम डिसुजाले २–२ विकेट लिए भने अलीअस्घर शुम्स र करण धिमानले १–१ विकेट लिए।

यसै प्रतियोगिताअन्तर्गत आजै मुलपानीमा सम्पन्न अर्को खेलमा अफगानिस्तानले ओमानलाई हराउँदै विजयी सुरुआत गरिसकेको छ।