डीएसपी श्रेष्ठा ठाकुरमाथि श्रीमानको सनसनीपूर्ण खुलासा : पुरानो प्रेम सम्बन्धदेखि प्रमाण मेटाउने आरोपसम्म

काठमाडौं, वैशाख २९ – ‘लेडी सिंघम’को नामले चर्चित उत्तर प्रदेशकी डीएसपी श्रेष्ठा ठाकुर फेरि एकपटक विवादमा तानिएकी छन्। यसपटक उनको व्यक्तिगत जीवन चर्चामा आएको छ, जहाँ उनका श्रीमान रोहित सिंहले गम्भीर आरोपहरू सार्वजनिक गरेका छन्।

रोहित सिंहका अनुसार, उनको र डीएसपी ठाकुरको पहिलो भेट सन् २०१७ मा सामाजिक सञ्जालमार्फत भएको थियो। त्यसपछि, लखनऊको हजरतगंजस्थित एक मन्दिरमा उनीहरूले विवाह गरे। २०१८ मा भने पटनाको सगुणा मोडमा रहेको एक विवाह हलमा दोस्रोपटक धुमधामका साथ विवाह गरिएको थियो। रोहितको दाबी अनुसार दुबै विवाहको सम्पूर्ण खर्च उनले नै व्यहोरेका थिए।

यस सम्बन्धमा रोहित भन्छन्, “यदि म नक्कली आईआरएस अधिकारी हुँ भने, एक वरिष्ठ प्रहरी अधिकारीले दुईपटक विवाह गर्ने कुरा कसरी स्वीकार्न सकिन्?” उनले थप आरोप लगाउँदै डीएसपी श्रेष्ठाले आफूलाई झूटो ठगी र जालसाजीको आरोपमा फसाउन खोजेको बताए।

यसैबीच, रोहितले २.५ करोड भारु दाइजोको मागसमेत भएको दाबी गरेका छन्। उनले श्रेष्ठा ठाकुरको परिवारमा विवाह दीर्घकालीन रूपमा टिक्दैन भन्ने पनि बताएका छन् र यसमा विशेष रूपमा सासू आमालाई दोष दिएका छन्।

विवाद यत्तिमा मात्र सीमित छैन। रोहितले डीएसपी श्रेष्ठा ठाकुर र कौशाम्बीका एसएचओ सर्वेश पालबीच लामो समयदेखि ‘पुरानो सम्बन्ध’ रहेको आरोप पनि लगाएका छन्। उनका अनुसार, फेब्रुअरी ८, २०२४ मा एसएचओ पाल २५ जना प्रहरी जवानसहित आएर आफूलाई जबरजस्ती प्रहरी चौकीमा लगेको र मोबाइलबाट सबै प्रमाणहरू मेटाइदिएको आरोप लगाए।

यस सम्बन्धमा रोहित सिंहले गाजियाबाद अदालतमा डीएसपी श्रेष्ठा ठाकुर, उनका भाइ र एसएचओ सर्वेश पालविरुद्ध भारतीय दण्ड संहिता अन्तर्गत धारा १५६(३) अनुसार मुद्दा दायर गरेका छन्। मुद्दा हाल अदालतमा विचाराधीन अवस्थामा रहेको छ, र सत्य तथ्य अदालतले नै पुष्टि गर्नेछ।