तमु ल्होसार धुमधाम साथ मनाउने तयारी

पुस,९ काठमाडौँ। तमु समुदायले आफ्नो महान पर्व तमु ल्होसार धुमधामले मनाउने तयारी गरेको छ ।

तमू ल्होसार मूल आयोजक समितिले मंगलबार काठमाडौंमा पत्रकार सम्मेलन गर्दै प्रधानमन्त्री केपी ओलीको उपस्थितिमा पुस १५ गते काठमाडौंको टुँडिखेलमा धुमधामका साथ तमु ल्होसार पर्व मनाउन लागेको जनाएको हो ।

तमू थातथलोको संरक्षण र सम्बद्र्धनका लागि मौलिक पहिचानको आह्वान, सरकारी कामकाजी भाषा तमु भाषा घोषणाका लािग तमूवानको आन्दोलन भन्ने मूलनारासहित काठमाडौंमा पुस १३ देखि १५ गतेसम्म विभिन्न कार्यक्रम आयोजना गरिएको छ ।

गुरुड वर्गको विदाई र सर्प वर्गको स्वागत गरी मनाइने ल्होसारका अवसरमा लोकदोहोरी प्रतियोगिता, नृत्य प्रतियोगिता, खेलकुद प्रतियोगिता आयोजना गरिएको तमु ल्होसार मूल आयोजक समितिका महासचिव राम बहादुर तमूले जानकारी दिनुभयो ।

लामा पुरोहितहरुद्धारा १४ गते रातको १२ बजेसम्म दुःख दोखलोका ग्रह दशा शान्ति गरी पुस १५ गते नयाँ विहानीको झुल्के घाममा नयाँ वर्गको स्वागत गरी मनाउने परम्परा रहेको तमू ह्युल छोंज धीं गुरुङ राष्ट्रिय परिषद्‌ले जनाएको छ ।