नेपाल रेडक्रसको आयोजनामा नुवाकोटमा आपतकालीन खानेपानी, सरसफाइ तथा स्वच्छतासम्बन्धी तालिम सम्पन्न

नुवाकोट । नुवाकोटको विदुरमा आपतकालीन खानेपानी, सरसफाइ तथा स्वच्छता प्रवर्द्धनसम्बन्धी दुईदिने तालिम सम्पन्न भएको छ ।

नेपाल रेडक्रस सोसाइटीको आयोजनामा भएको तालिम रसुवा–भोटेकोशी बाढी प्रतिकार्यका लागि रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासंघ (IFRC) को आपतकालीन प्रतिक्रिया इकाइ (ERU) सँगको सहकार्यमा सञ्चालन गरिएको हो ।

तालिममा नेपाल रेडक्रस सोसाइटीका स्वयंसेवकहरूलाई विपद्का समयमा आश्रयस्थलमा वितरण गरिने खानेपानी प्रशोधन, घरधुरीस्तरमा खानेपानी शुद्धीकरण तथा आपतकालीन स्वच्छता प्रवर्द्धनका विषयमा प्रशिक्षण दिइएको थियो ।

तालिममा सैद्धान्तिकसँगै व्यवहारिक अभ्याससमेत गराइएको थियो । विपद्का समयमा खानेपानी, सरसफाइ तथा स्वच्छतासम्बन्धी सेवा प्रभावकारी रूपमा सञ्चालन गर्न स्वयंसेवकहरूलाई आवश्यक सीप र ज्ञान प्रदान गरिएको रेडक्रसले जनाएको छ ।

तालिमपछि स्वयंसेवकहरूलाई आपतकालीन अवस्थामा परिचालन गरी प्रभावित समुदायमा सुरक्षित खानेपानी तथा स्वच्छता सेवा पुर्‍याउन सहयोग पुग्ने अपेक्षा गरिएको छ ।