नेपाल रेडक्रसमा राजनीतिक दलमा आबद्ध पदाधिकारीलाई हटेर सांगठनिक सुधार गर्न आग्रह

काठमाडौँ। नेपाल रेडक्रस सोसाइटी (नेरेसो) ले संस्थाभित्र सांगठनिक सुधारका लागि दलगत राजनीतिमा सक्रिय रहेका आफ्ना पदाधिकारी तथा सदस्यहरूलाई पदबाट अलग हुन औपचारिक अनुरोध गरेको छ।

रेडक्रसमा राजनीतिक दलहरूको प्रभाव र संलग्नताका कारण पछिल्लो समय संस्थागत समस्याहरू जटिल बन्दै गएको र अन्तर्राष्ट्रिय महासङ्घ (IFRC) ले समेत प्रतिबन्ध लगाउनेसम्मको नीति अख्तियार गरेको भन्दै रेडक्रसले यो कदम चालेको हो।

नेपाल रेडक्रस सोसाइटीको विधान २०२० (अठारौँ संशोधन २०८२ सहित) को दफा ७२ को उपदफा ३ अनुसार, सक्रिय राजनीति वा राजनीतिक दलको भातृ सङ्गठनमा रहेका, वा शासकीय संरचनामा बहाल रहेका व्यक्तिहरू रेडक्रसको कुनै पनि तहको समिति, आयोग वा उपसमितिमा रहन नपाउने प्रस्ट व्यवस्था रहेको छ।

विधानको उक्त प्रावधानलाई उद्धृत गर्दै रेडक्रस केन्द्रीय कार्यालयले कुनै पनि तहका समितिमा रहेका पदाधिकारी वा सदस्यहरू राजनीतिक दल वा भातृ सङ्गठनको पदमा बहाल भए स्वस्फूर्त रूपमा रेडक्रसको संलग्नताबाट अलग हुन आग्रह गरेको छ।

रेडक्रसका अनुसार विधानको यो व्यवस्थालाई अटेर गरी दोहोरो भूमिकामा रहेको पाइएमा मौजुदा विधान बमोजिम कारबाही प्रक्रिया अघि बढाइनेछ।

साथै, कुनै पनि तहका पदाधिकारी वा सदस्यहरू राजनीतिक दल वा तिनका भातृ सङ्गठनमा सक्रिय रहेको प्रमाण भएमा तथ्यसहित secretariat@nrcs.org मा इमेल मार्फत जानकारी गराउन समेत रेडक्रसले सर्वसाधारण तथा सरोकारवाला सबैसँग अपिल गरेको छ।