सर्लाही धनकौलका सामुदायिक विद्यालयमा एसईई नतिजा निराशाजनक : १४१ परीक्षार्थीमध्ये २० मात्र ग्रेडेड

सर्लाही । सर्लाहीको धनकौल गाउँपालिका अन्तर्गतका सामुदायिक माध्यमिक विद्यालयहरूको यस वर्षको माध्यमिक शिक्षा परीक्षा (एसईई) नतिजा अत्यन्त कमजोर देखिएको छ । नियमित तथा ग्रेडवृद्धि दुवै परीक्षामा ठूलो संख्यामा विद्यार्थी ‘ननग्रेडेड’ भएपछि स्थानीय शिक्षा क्षेत्रको गुणस्तरबारे गम्भीर प्रश्न उठेको छ
धनकौल गाउँपालिका शिक्षा शाखाका अनुसार नियमिततर्फ कुल १ सय ४१ जना विद्यार्थी एसईई परीक्षामा सहभागी भएका थिए। तीमध्ये केवल २० जना विद्यार्थी मात्र ‘ग्रेडेड’ भएका छन् भने १२१ जना विद्यार्थी ‘ननग्रेडेड’ भएका छन् ।
त्यस्तै, ग्रेडवृद्धितर्फ ३९ जना विद्यार्थी परीक्षामा सहभागी भएकोमा जम्मा १ जना मात्र ‘ग्रेडेड’ भएका छन् भने ३८ जना विद्यार्थी ‘ननग्रेडेड’ भएका छन्। पालिकामा तिन वटा सामुदायिक माध्यमिक बिद्यालय रहेका छन् ।
धनकौल बजारस्थित दुर्गा माध्यमिक विद्यालयबाट नियमिततर्फ ३४ जना विद्यार्थी परीक्षामा सहभागी भएकोमा ३ जना मात्र ‘ग्रेडेड’ भएका छन्। ३१ जना विद्यार्थी ‘ग्रेडेड’ भएका छन्। ग्रेडवृद्धितर्फ ७ जना सहभागी भएकोमा १ जना मात्र ‘ग्रेडेड’ भएका छन्।
हरकटवास्थित जनता माध्यमिक विद्यालयको नतिजा अझ कमजोर देखिएको छ। उक्त विद्यालयबाट नियमिततर्फ ६५ जना विद्यार्थी सहभागी भएकोमा ७ जना मात्र ‘ग्रेडेड’ भएका छन् भने ५८ जना विद्यार्थी ‘ननग्रेडेड’ भएका छन्। ग्रेडवृद्धि परीक्षामा सहभागी २५ जना विद्यार्थी सबै ‘ननग्रेडेड’ भएका छन्।
धोबिनियास्थित जनकल्याण माध्यमिक विद्यालयबाट ४२ जना विद्यार्थी नियमिततर्फ सहभागी भएकोमा १० जना मात्र ‘ग्रेडेड’ भएका छन्। बाँकी ३२ जना विद्यार्थी ‘ननग्रेडेड’ भएका छन्। ग्रेडवृद्धितर्फ सहभागी ७ जना विद्यार्थी पनि ‘ग्रेडेड’ हुन सकेनन्।
नतिजा हेर्दा अधिकांश विद्यार्थी न्यूनतम शैक्षिक मापदण्ड पुरा गर्न असफल भएको स्पष्ट देखिन्छ। लगातार कमजोर नतिजाका कारण सामुदायिक विद्यालयहरूको शिक्षण प्रणाली, कक्षा सञ्चालन, नियमित उपस्थिति तथा शिक्षकको शैक्षिक जिम्मेवारीमाथि प्रश्न उठ्न थालेको छ।
स्थानीय अभिभावकहरूले विद्यालयमा पढाइको गुणस्तर कमजोर रहेको, नियमित कक्षा प्रभावकारी रूपमा सञ्चालन नभएको तथा विद्यार्थीलाई पर्याप्त शैक्षिक मार्गदर्शन नदिइएको कारण यस्तो अवस्था आएको आरोप लगाएका छन्।
शिक्षा शाखा प्रमुख युक्ति रामले एसईईमा निराशाजनक नतिजा आएपछि अब अन्तरक्रिया गरिने बताएका छन्। के कारण यस्तो नतिजा आयो यो बिषयमा छानबिन गर्ने उनले बताए। जिल्लामा १० हजार २१ जना बिद्यार्थी सहभागी भएकामा ४ हजार ३ सय ६५ जना ‘ननग्रेडेड’ भएका छन्।