गण्डकी प्रदेशका मुख्यमन्त्री सुरेन्द्र पाण्डेले प्रदेश सरकारद्वारा पारित राइड सेयरिङसम्बन्धी निर्णय दृढताका साथ कार्यान्वयनमा लैजाने बताएका छन्।
बिहीबार नेपाली कांग्रेसको केन्द्रीय समिति बैठकमा बोल्दै मुख्यमन्त्री पाण्डेले सर्वोच्च अदालतको आदेशले आफूहरूको निर्णय कार्यान्वयन गर्न थप सहज भएको धारणा राखे। “राइड सेयरिङ लागू गर्ने निर्णयमा म अडिग छु, यो लागू गरेरै छाड्नेछु,” उनले भने।
मुख्यमन्त्री पाण्डेका अनुसार राइड सेयरिङको व्यवस्था लागू नभएकाले नागरिकहरू अत्यधिक भाडा तिर्न बाध्य छन्। उनले उदाहरण दिँदै भने, “जहाँ तीन सय रुपैयाँमै पुग्न सकिन्छ, त्यहीँ ट्याक्सीले १५ सयसम्म असुल्ने अवस्था छ।”
उनले जनताको सुविधा विपरीत भइरहेका अवरोधहरूप्रति आफू नझुक्ने पनि स्पष्ट पारे। “जनतालाई ठग्ने किसिमका आन्दोलनबाट म पछि हट्दिन,” मुख्यमन्त्री पाण्डेले भने।
पाण्डे नेपाली कांग्रेसका केन्द्रीय सदस्यसमेत हुन्।
