हमासको आक्रमणमा ज्यान गुमाएका थप तीन नेपालीको शव पहिचान भएको छ।
इजरायलको तेल अबिबस्थित नेपाली दूतावासले हमासको आक्रमणमा मारिएका थप ३ नेपाली विद्यार्थीको शव पहिचान भएको जानकारी आएको बताएको छ । दूतावासका अनुसार पदम थापा, प्रवेश भण्डारी र राजन फुलाराको पहिचान भएको छ ।
हमासको आक्रमणमा इजरायलमा १० नेपाली मारिएका थिए । तीमध्ये ५ जनाको शव यसअघि नै पहिचान भई नेपाल ल्याइसकिएको छ । बाँकी दुई जनाको भने हालसम्म शव पहिचान हुन सकेको छैन ।
आक्रमणमा घाइते भएका ४ जनामध्ये २ जना अस्पतालबाट डिस्चार्ज भएका छन् भने एक जना नेपाल पुगिसकेका छन् र एक जना इजरायलको नेपाली दूतावासको हेरचाहमा रहेका छन् ।
इजरायली सेना र हिजबुल्लाहबीच भिडन्तमा एक नेपाली सेना घाइते !
लेबनानमा खटिएका नेपाली शान्ति सैनिक इजरायली प्रतिरक्षा फौज (आईडीएफ) र लेबनानको लडाकु समूह हिजबुल्लाहबीच दोहोरो युद्ध चलिरहेका बेला खसेको गोलीको छर्रा लागेर इजरायल र लेबनानको सीमा क्षेत्रमा खटिएका एक जना नेपाली शान्ति सैनिक घाइते भएका छन् ।
नेपाली सेनाका प्रवक्ता सहायक रथी कृष्णप्रसाद भण्डारीका अनुसार इजरायल र लेबनानको सीमाक्षेत्रमा दुई पक्षबीचको युद्धका क्रममा नेपाली शान्ति सैनिकको फौज बसेको बंकरमा खसेको पुष्टि भइनसकेको हतियारको छर्रा लाग्दा एकजना घाइते भएका हुन् । स्थानीय समयअनुसार शनिबार राति करिब १० बजेको समयमा उक्त घटना भएको उनको भनाइ छ ।
‘बंकरमा खसेको सेल कुन हतियारको हो भन्ने पुष्टि भइसकेको छैन । मोर्टार सेल वा रकेटको सेल हुनसक्ने अनुमान मात्रै हो’, भण्डारीले भने, ‘घाइते एक जनाको दायाँ हात र पेटको दायाँ भागमा सामान्य चोट लागेको छ । घाइतेलाई बटालियनको मेडिकल क्याम्पमा प्राथमिक उपचार गरेर शान्ति सैनिकको उपचार गरिने नाकुरा अस्पतालमा रिफर गरिएको छ । उनको अवस्था सामान्य रहेको छ ।’
उक्त घटनामा शान्ति सैनिक बस्ने एउटा बंकर र एउटा गाडीमा सामान्य क्षति पुगेको र त्यसबाहेक सबै सुरक्षित रहेको उनले जानकारी दिए ।
लेबनानमा हाल ८७४ नेपाली शान्ति सैनिक कार्यरत छन् ।
प्रतिकृया दिनुहोस्