काठमाडौं। नेपाली कांग्रेसका सांसद डा. सुनिल शर्माले सुन तस्करहरुका संरक्षक उपप्रधान तथा गृहमन्त्री नारायणकाजी श्रेष्ठ र अर्थमन्त्री डा. प्रकाशशरण महत नै रहेको ठोकुवा गर्नुभएको छ । सत्तारुढ दल कांग्रेसका सांसद शर्माले आफूले सुन तस्करीबारे बोलेकै कारण गृहमन्त्रीले तस्कर समुह जोगाउनकै लागि आफूलाई झुटो आरोप लगाएर आतंककारी शैलीमा पक्राउ गरेको बताउनु भयो ।
‘सुन तस्करहरुका संरक्षक गृहमन्त्री र अर्थमन्त्री नै हो, मलाई प्रधानमन्त्रीकै आदेशमा पक्राउ गरेपछि त यो कुरा प्रमाणित भयो, तस्कर समुहलाई जोगाउन मलाई हुँदै नभएको झेुटो आरोप लगाएर पक्राउ गरियो,’ शर्माले भन्नुभयो, ‘यस्तो आतंककारी गृहमन्त्री एक मिनेट पनि पदमा बस्न मिल्दैन । तत्काल हटाउनु पर्छ । प्रधानमन्त्री जोगाउन लाग्नुभयो भने यो सरकार नै ढल्छ ।’
सांसद शर्माले आफूले तीन बिषयमा प्रबिनता प्रमाणपत्र तह (आइए) उतिर्ण गरेको तथ्य हुँदाहुँदै तस्करीबिरुद्ध बोलेको कारण गृहमन्त्रीले सत्ता उन्मादमा थुन्न लगाएको तर अदालतले न्याय गरेको बताउनु भयो । उहाँले गृहमन्त्री र अर्थमन्त्री नहटाए अनसन बस्ने अडान यथावत रहेको पनि बताउनु भएको छ ।
‘मेरो माग यसरी नै गृहमन्त्रीले हाम्रा नेता, हामी सांसदलाई एक एक गरी फसाउने र हाम्रो पार्टी माओवादीसँग एलाइन्समा रहिरहने हो भने हाम्रो पार्टी सकिन्छ । माओवादीसँगको सहकार्यमा तत्काल पुनर्बिचार गर्नुपर्छ,’ शर्माले भन्नुभयो, ‘मेरो पार्टीका नेताहरुलाई मेरो आग्रह छ–माओवादीसँगको एलाइन्स तत्काल पुनर्बिचार गर्नूपर्छ ।’
प्रतिकृया दिनुहोस्