निरा आचार्यको हत्या आरोपमा प्रहरीले १० दिनपछि एक जनालाई पक्राउ गर्न सफल भयो । प्रहरीको केन्द्रीय अनुसन्धान ब्युरो (सीआईबी) र उपत्यका अपराध अनुसन्धान कार्यालयको टोलीले झापा धुलाबारीका विनोद विकलाई पक्राउ गरेकाे हाे ।
विकलाई प्रहरीले झापाबाट पक्राउ गरेकाे हाे । उनलाई प्रहरीले आइतबार काठमाडौं ल्याएर सार्वजनिक गरेको छ ।निराको हत्या गरेको पाँच दिनपछि उनी झापा पुगेको खुलेको थियो । सेभेन स्टार बाउन्सर सर्भिसमार्फत विकले ठमेलका विभिन्न क्लबमा बाउन्सरको काम गर्ने गरेको खुलेको छ । विकले सुनको सिक्री लुट्न खोज्दा आचार्यले प्रतिकार गरेपछि हत्या गरेको खुलेको छ ।
प्रहरीलाई हत्यारा विकसम्म पुग्न हम्मेहम्मे नै परेको थियो । निरा हत्याबारेको अनुसन्धानबारे गृहमन्त्री नारायणकाजी श्रेष्ठले समेत संसदमा जवाफ दिएका थिए । प्रहरीमाथिको चौतर्फी दबाबपछि सीआईबीका प्रमुख अतिरिक्त महानिरीक्षक (एआईजी) किरण वज्राचार्य नेतृत्वमा अनुसन्धान समिति नै बनाएको थियो ।
त्यसअघि उपत्यका प्रहरी कार्यालयका एसएसपी हिमालय श्रेष्ठ, उपत्यका अनुसन्धान कार्यालयका एसपी रवीन्द्र रेग्मी र काठमाडौं प्रहरी परिसरको अनुसन्धान टोली घटनाकाे अनुसन्धानमा खटिएका थिए । प्रहरीले निरा हत्याबारे विभिन्न कोणबाट अनुसन्धान गरेको थियो ।
निराको ६ महिनायताको ट्राभल रेकर्डदेखि निरा र उनको श्रीमान्सँगको सम्बन्धबारे समेत प्रहरीले मिहिन ढंगले अनुसन्धान गरेको थियो । निराको हत्या गरिएको कपन क्षेत्रका विभिन्न टावरसँग सम्पर्क भएका मोबाइल नम्बरको बीटीएसहरूको विश्लेषण प्रहरीले गरेको थियो । तर, प्रहरीले भरपर्दो कुनै क्लु भने फेला पार्न सकेको थिएन ।
सीसी टीभीमा देखिएको त्यो शंकास्पद फुटेज
प्रहरीले निरा हत्याबारे विभिन्न कोणबाट अनुसन्धान गरे पनि भरपर्दो क्लु भने फेला पार्न सकेको थिएन । निराको पसलमा समेत सीसी टीभी जडान नगरिएको हुँदा घटना झन् रहस्यमय बन्दै गएको थियो ।
प्रतिकृया दिनुहोस्